టీమ్ఇండియా మాజీ కెప్టెన్ మహేంద్రసింగ్ ధోనీ.. అంతర్జాతీయ క్రికెట్లో ఇకపై ఆడే అవకాశం ఉండదేమోనని అభిప్రాయపడ్డాడు మాజీ క్రికెటర్ ఆకాశ్ చోప్రా. ధోనీ భవితవ్యంపై రకరకాల ఊహాగానాలు వస్తున్న నేపథ్యంలో ఈ వ్యాఖ్యలు చేశాడు. గతేడాది ప్రపంచకప్ సెమీస్ మ్యాచ్ ధోనీ కెరీర్లో చివరి అంతర్జాతీయ మ్యాచ్ అని ఆకాశ్ అభివర్ణించాడు. ఈ విషయాన్ని పాకిస్థాన్ క్రికెటర్ రమీజ్ రాజాతో జరిపిన యూట్యూబ్ సమావేశంలో ప్రస్తావించాడు.
అదే వీడ్కోలు కావొచ్చు
అక్టోబరులో జరగనున్న టీ20 ప్రపంచకప్ తుది జట్టులో ధోనీని తీసుకోవడానికి మేనేజ్మెంట్, భారతీయ క్రికెట్ నియంత్రణ మండలి (బీసీసీఐ) ఆసక్తి చూపిస్తే.. మహీ తిరిగి జట్టులోకి వచ్చే అవకాశాలున్నాయన్నాడు. అంతేకాకుండా మిస్టర్ కూల్.. ఎలాంటి ఆర్భాటాలు లేకుండా వీడ్కోలు పలికే అవకాశముందన్నాడు.
ప్రపంచకప్ తర్వాత విరామం తీసుకోవటం వల్ల ఇప్పటికే జరిగిన అనేక టోర్నీల్లో స్థానం కోల్పోయాడు మహీ. మరోవైపు ఐపీఎల్ ద్వారా రీఎంట్రీ ఇస్తే.. తన ఫామ్ ఆధారంగా జట్టులో చోటిస్తామని ప్రకటించాడు టీమ్ఇండియా ప్రధానకోచ్ రవిశాస్త్రి. ఈ నేపథ్యంలో కరోనా కారణంగా ఐపీఎల్ 2020 వాయిదా పడింది. ఇలాంటి పరిస్థితుల్లో ధోనీ పునరాగమనం కష్టమేనని పలువురు మాజీలు అభిప్రాయం వ్యక్తం చేస్తున్నారు.
ఇదీ చూడండి.. స్టెయిన్ ఎదుర్కొన్న ఉత్తమ బ్యాట్స్మెన్ వీరే!
