ఇంగ్లాండ్ క్రికెట్ బోర్డు(ఈసీబీ) ఉద్యోగాల్లో కోత విధిస్తూ నిర్ణయం తీసుకుంది. బోర్డులో పని చేస్తున్న 20 శాతం(62 మందికి సమానం) ఉద్యోగులను తీసేస్తున్నట్లు సీఈఓ టామ్ హారిసన్ తెలిపారు. కరోనా కారణంగా ఆర్థిక ప్రభావం ఎదుర్కొంటున్న నేపథ్యంలో ఈ నిర్ణయం తీసుకున్నట్లు చెప్పారు.
"బోర్డుపై ఆర్థిక ప్రభావం పడుతున్నందున ఇటీవలి వారాల్లో అనేక చర్చల అనంతరం కొన్ని ప్రతిపాదనలు తీసుకొచ్చాం. వీటిని సహోద్యోగులతో పంచుకున్నాం. ఇందులో బాగంగా కొంత మందిని ఉద్యోగాల నుంచి తీసేయాలని నిర్ణయించాం. తద్వారా బోర్డుపై ప్రభావం తగ్గుతుంది."
-టామ్ హారిసన్, ఈసీబీ సీఈఓ
ఈ కారణంగా ఉద్యోగాలు కోల్పోయిన వారికి భవిష్యత్తులో సాయం చేసేలా ఈసీబీ ఆలోచిస్తోందని హారిసన్ పేర్కొన్నారు. ఈ విషయంపై త్వరలోనే సమాచారాన్ని తెలియచేస్తామని స్పష్టం చేశారు.
