డిసెంబర్ 1, 2006.. భారత క్రికెట్ చరిత్రలో మరిచిపోలేని రోజు. ఎందుకంటే దిగ్గజ క్రికెటర్ సచిన్ తెందూల్కర్ ఏకైక టీ20 మ్యాచ్ ఆడింది ఈరోజే. అదే టీమిండియాకు తొలి అంతర్జాతీయ టీ20 కావడం విశేషం.
తొలిసారి అంతర్జాతీయ టీ20 మ్యాచ్లో దక్షిణాఫ్రికాతో తలపడింది టీమిండియా. ఈ ఫార్మాట్లో ప్రపంచ వ్యాప్తంగా ఇది పదో మ్యాచ్. దీనికి వీరేంద్ర సెహ్వాగ్ సారథ్యం వహించాడు. ఈ జట్టులో సచిన్, మహేంద్ర సింగ్ ధోనీ, సురేశ్ రైనా, హర్భజన్ సింగ్ ఉన్నారు. ఈ మ్యాచ్లో భారత్ 6 వికెట్ల తేడాతో గెలిచింది. దినేశ్ కార్తీక్ 31* పరుగులతో అజేయంగా నిలిచి మ్యాన్ ఆఫ్ ద మ్యాచ్ కైవసం చేసుకున్నాడు.
మ్యాచ్ సాగిందిలా...
గ్రేమ్ స్మిత్ సారథ్యంలోని దక్షిణాఫ్రికా టాస్ గెలిచి బ్యాటింగ్ ఎంచుకుంది. నిర్ణీత 20 ఓవర్లలో 9 వికెట్ల నష్టానికి 126 పరుగులు చేసింది. జహీర్ ఖాన్, అజిత్ అగార్కర్ చెరో రెండేసి వికెట్లు పడగొట్టగా.. సచిన్, హర్భజన్, శ్రీశాంత్ తలో వికెట్ సాధించారు.
రెండో ఇన్నింగ్స్లో బ్యాటింగ్కు దిగిన టీమిండియాకు ఆరంభం అంతగా కలిసిరాలేదు. సచిన్ 10 పరుగులకే ఔటయ్యాడు. సెహ్వాగ్(34) మరో బ్యాట్స్మన్ మోంగియాతో కలిసి 50 పరుగుల భాగస్వామ్యం నెలకొల్పి పెవిలియన్ చేరాడు. ఈ మ్యాచ్లో ధోనీ డకౌట్గా వెనుదిరిగాడు. అనంతరం మోంగియా, దినేశ్ కార్తీక్ కాసేపు పోరాడారు. ఆఖర్లో మోంగియా ఔటైనా... రైనా వచ్చి మ్యాచ్ ముగించేశాడు.
సచిన్ ఆడిన ఒకే ఒక్క మ్యాచ్..
రికార్డుల రారాజు, మాస్టర్ బ్లాస్టర్ సచిన్ తెందూల్కర్కు టీ20 ఆడాలన్న కోరిక తీరింది ఆరోజే. కానీ మ్యాచ్ తర్వాత ఇంకెప్పుడూ అంతర్జాతీయ టీ20 ఆడలేదు మాస్టర్. ఈ మ్యాచ్లో 10 పరుగులే చేసి నిరాశపర్చాడు.
జట్టు ఇదే...
వీరేంద్ర సెహ్వాగ్(కెప్టెన్), సచిన్ తెందూల్కర్, దినేశ్ మోంగియా, ఎమ్ఎస్ ధోనీ(కీపర్), దినేశ్ కార్తీక్, సురేశ్ రైనా, ఇర్ఫాన్ పఠాన్, హర్భజన్ సింగ్, జహీర్ ఖాన్, అజిత్ అగార్కర్, శ్రీశాంత్
ఈ మ్యాచ్ జరిగిన తర్వాతి ఏడాది 2007లో ఐసీసీ టీ20 ప్రపంచకప్.. దక్షిణాఫ్రికాలో జరిగింది. ధోనీ సారథ్యంలోని టీమిండియా ఫైనల్లో పాకిస్థాన్ను ఓడించి టైటిల్ కైవసం చేసుకుంది.
- " class="align-text-top noRightClick twitterSection" data="">
