కోహ్లీసేనను స్లెడ్జ్ చేసేందుకు ఆస్ట్రేలియా క్రికెటర్ భయపడుతున్నారని సంచలన వ్యాఖ్యలు చేశాడు ఆ దేశ మాజీ క్రికెటర్ మైకేల్ క్లార్క్. తమ ఐపీఎల్ కాంట్రాక్ట్లు కాపాడుకునేందుకు వారు ఇలా చేస్తున్నారని అభిప్రాయపడ్డాడు. తాజాగా జరిగిన ఓ కార్యక్రమంలో మాట్లాడుతూ ఈ విషయాల్ని చెప్పాడు.
"క్రికెట్లో ఆర్థికంగా భారత్ ఎంత శక్తిమంతమైనదో అందరికీ తెలుసు. అందుకే ఆస్ట్రేలియాతో పాటు మిగిలిన జట్లు కొంతకాలం నుంచి టీమిండియాను చూసి భయపడుతున్నాయి. కోహ్లీతో పాటు మిగతా క్రికెటర్లను స్లెడ్జ్ చేసేందుకు వెనకాడుతున్నాయి. ఏప్రిల్లో భారత్ ఆటగాళ్లతో కలిసి ఆడాలని వారికి తెలుసు. కోహ్లీ సారథ్యం వహిస్తున్న బెంగళూరు జట్టు వారిని తీసుకుంటే, ఆరు వారాల్లో మిలియన్ డాలర్లు సంపాదించొచ్చని చాలా మంది అనుకుంటున్నారు. అందుకే మైదానంలో కోహ్లీసేనతో దురుసుగా ప్రవర్తించడం లేదు" -మైకేల్ క్లార్క్, ఆసీస్ మాజీ క్రికెటర్
ఐపీఎల్ 13వ సీజన్.. కరోనా ప్రభావంతో ఈనెల 15కు వాయిదా పడింది. అయితే వైరస్ వ్యాప్తి ఎక్కువవతుండటం వల్ల ఈ టోర్నీ జరుగుతుందా? లేదా? సందేహాలు వస్తున్నాయి.
ఈ సీజన్ కోసం ఆసీస్ ఆలౌరౌండర్ పాట్ కమిన్స్ను కోల్కతా నైట్రైడర్స్... రూ.15.5 కోట్లు పెట్టి కొనుగోలు చేసింది. ఐపీఎల్ ఇప్పటివరకు అత్యధిక ధర పలికిన విదేశీ క్రికెటర్ ఇతడే. వీరితో పాటే మ్యాక్స్వెల్ను రూ.10.75 కోట్లు(కింగ్స్ ఎలెవన్ పంజాబ్), కౌల్టర్నైల్ను రూ.8 కోట్లు(ముంబయి ఇండియన్స్) కొనుగోలు చేశారు.
