ఇంగ్లాండ్ క్రికెట్లో వివాదాస్పద ట్వీట్ల దుమారం కొనసాగుతోంది. ఇందులో భాగంగా ఈ ట్వీట్లపై క్రమశిక్షణ ఉల్లంఘన చర్యల కింద చేపట్టిన విచారణను వేగవంతం చేసింది ఇంగ్లాండ్ క్రికెట్ బోర్డు. వరుసగా ఆటగాళ్లను విచారించడం ప్రారంభించింది. ఈ క్రమంలోనే ప్రస్తుత కెప్టెన్ ఇయాన్ మోర్గాన్(Eoin Morgan), వికెట్కీపర్-బ్యాట్స్మన్ జాస్బట్లర్ను(Jos Buttler) కూడా విచారిస్తోంది.
ఎనిమిదేళ్ల క్రితం స్త్రీ వివక్ష, జాత్యంహకార సందేశాలను సామాజిక మాధ్యమాల్లో పోస్ట్లు చేశాడని యువ బౌలర్ ఒల్లీ రాబిన్సన్ (Ollie Robinson)ను అంతర్జాతీయ క్రికెట్ నుంచి ఇటీవల సస్పెండ్ చేసింది ఈసీబీ. ఈ సంఘటన జరిగిన వెంటనే బట్లర్, మోర్గాన్ గతంలో భారతీయులను అపహాస్యం చేస్తూ చేసిన ట్వీట్ల స్క్రీన్షాట్లు సోషల్మీడియాలో వైరల్ అయ్యాయి. అందులో వారు 'సర్'(సెటైరికల్గా) అని సంబోధించారు. దీనిపై నెటిజన్లు స్పందిస్తూ.. 'రాబిన్సన్ను సస్పెండ్ చేసినట్లుగానే వీరిద్దరిపై కూడా నిషేధం విధించగలిగే దమ్ము ఉందా?' అంటూ కామెంట్లు పెడుతున్నారు. ఈ క్రమంలోనే ఈ ట్వీట్లను పరిగణలోకి తీసుకుని ఈసీబీ ఈ క్రికెటర్లను విచారించడం ప్రారంభించింది. ఐపీఎల్లో బట్లర్(రాజస్థాన్ రాయల్స్), మోర్గాన్(కోల్కతా నైటర్ రైడర్స్)కు ప్రాతినిధ్యం వహిస్తున్నారు.
చర్యలు తీసుకుంటాం
ఈ వివాదస్పదనమైన ట్వీట్లను చేసిన వారిపై నిష్పాక్షికంగా విచారణ చేపట్టి నిజనిజాలను నిర్ధరణ చేసుకుని తగిన చర్యలు కచ్చితంగా తీసకుంటామని ఈసీబీ(ECB) మరోసారి వెల్లడించింది. ఆటలో వివక్షకు చోటు లేదని చెప్పింది.
డిలీట్ చేసే పనిలో ప్లేయర్స్
జాత్యాహంకార వ్యాఖ్యల్ని ఏమాత్రం సహించబోమని ఈసీబీ హెచ్చరించిన నేపథ్యంలో ఇంగ్లాండ్ క్రికెటర్లు తమ పాత వివాదస్పద ట్వీట్లను తొలిగించే పనిలో బిజీ అయ్యారు. సీనియర్ ఫాస్ట్ బౌలర్ జేమ్స్ అండర్సన్ 11ఏళ్ల క్రితం తన సహచర ఆటగాడు స్టువర్ట్ బ్రాడ్ను లెస్బియన్గా అభివర్ణించిన ట్వీట్ను డిలీట్ చేశాడు. బట్లర్, మోర్గాన్ కూడా తమ ట్వీట్లను తొలగించారు. కానీ అవి అప్పటికే వైరల్ అయిపోయాయి.
ఇదీ చూడండి: జాతి వివక్ష: మరో క్రికెటర్ సస్పెండ్ కానున్నాడా?
