భారత పురుషుల జట్టు కొత్త కోచింగ్ బృందం కోసం.. భారత క్రికెట్ నియంత్రణ మండలి(బీసీసీఐ) దరఖాస్తులను ఆహ్వానించింది. హెడ్ కోచ్, బ్యాటింగ్, బౌలింగ్, ఫీల్డింగ్ కోచ్ పదవులకు నోటిఫికేషన్ విడుదల చేసింది. అర్హత, ఆసక్తి ఉన్నవారు నిర్దేశించిన గడువులోగా అప్లికేషన్లు సమర్పించాలని స్పష్టం చేసింది.
జాతీయ క్రికెట్ అకాడమీలోనూ(ఎన్సీఏ) పలు ఖాళీలనూ భర్తీ చేయనుంది.
అర్హతలు..
- వయసు 60 ఏళ్లకు మించరాదు.
- ప్రధాన కోచ్ పదవికి అప్లై చేసేవారు.. కనీసం 30 టెస్టు మ్యాచ్లు లేదా 50 వన్డే మ్యాచ్లు ఆడినవారై ఉండాలి. లేదా
- పూర్తిస్థాయి టెస్టు హోదా కలిగిన దేశానికి కనీసం రెండేళ్లు హెడ్ కోచ్గా పనిచేసి ఉండాలి. లేదా
- దేశవాళీ లీగ్లు, ఐపీఎల్/ ఇతర అంతర్జాతీయ లీగ్లు, నేషనల్-ఏ టీమ్లకు కనీసం మూడేళ్ల ప్రధాన కోచ్గా చేసుండాలి.
కీలక తేదీలివే..
- హెడ్ కోచ్- అక్టోబర్ 26 సాయంత్రం 5 గంటలలోగా అప్లికేషన్లు స్వీకరిస్తారు.
- బ్యాటింగ్, బౌలింగ్, ఫీల్డింగ్ కోచ్- నవంబర్ 3 సాయంత్రం 5 గంటల వరకు సమయం ఉంది.
ద్రవిడే ఖాయం..
ఇండియా క్రికెట్ టీమ్కు.. ప్రస్తుతం ఎన్సీఏ హెడ్ కోచ్గా ఉన్న రాహుల్ ద్రవిడే తదుపరి కోచ్ అని ఓ బీసీసీఐ అధికారి చెప్పిన వేళ.. బోర్డు ఈ నోటిఫికేషన్ విడుదల చేయడం గమనార్హం. ద్రవిడ్ నియామకం ఖాయమే అయినప్పటికీ, కోచింగ్ ప్రక్రియను పద్ధతి ప్రకారమే నిర్వహించనున్నట్లు తెలుస్తోంది. ద్రవిడ్ రెండేళ్ల కాంట్రాక్ట్కు ఒప్పుకున్నట్లు సమాచారం.
లోధా కమిటీ సూచనల ప్రకారం.. కోచ్ ఎంపిక క్రికెట్ సలహా కమిటీనే(సీఏసీ) చేపట్టాలి. ఎంతమంది దరఖాస్తు చేసుకున్నా, ఇంటర్వ్యూలకు ఎవరు వచ్చినా.. ద్రవిడ్ ఎంపిక లాంఛనమే అన్నది బోర్డు వర్గాల సమాచారం. ద్రవిడ్ టీమ్ ఇండియా కోచ్ అయ్యాక అండర్-10, ఇండియా-ఏ జట్లకు కొత్త కోచ్లను నియమించే అవకాశం ఉంది. ఎన్సీఏ బాధ్యతలను కూడా మరొకరికి అప్పగించవచ్చు.
యూఏఈలో జరిగే 2021 టీ-20 వరల్డ్కప్ ముగిసిన అనంతరం.. హెడ్ కోచ్ రవిశాస్త్రి సహా ప్రస్తుత కోచింగ్ బృందం పదవీకాలం ముగియనుంది. ఈ నేపథ్యంలోనే కొత్త బృందం వేటలో పడింది బీసీసీఐ.
