ప్రపంచ ఛాంపియన్షిప్స్ విజేత పీవీ సింధు.. ఈ ఏడాది ఎలాంటి టోర్నీల్లోనూ ఆడేలా కనిపించడం లేదు. ఈ విషయాన్ని ఆమెనే స్వయంగా వెల్లడించింది. తన దృష్టంతా 2021పైనే ఉందని చెప్పింది.
ఇటీవలే జరిగిన డెన్మార్క్ ఓపెన్ నుంచి తప్పుకున్న సింధు.. వచ్చే ఏడాది జనవరిలోనే కోర్టులో అడుగుపెడతానని తెలిపింది. టోక్యో ఒలింపిక్స్లో పాల్గొనే తనపై ఈ అంశాలేవి ప్రభావం చూపవని అభిప్రాయపడింది.
"బ్యాడ్మింటన్ను చాలా మిస్సవుతున్నాను. కానీ ప్రతిరోజూ ఇంట్లో ప్రాక్టీసు చేస్తూనే ఉన్నాను. మళ్లీ కోర్టులో అడుగుపెడితే కుదురుకోవాడానికి ఒకటి, రెండు వారాలు మాత్రమే పడుతుంది. ప్రస్తుతానికి బాగానే ఉన్నాను. టోర్నీలు ప్రారంభం కావడం గురించి ఎదురుచూస్తున్నాను. ఏడు నెలల విరామం తర్వాత గేమ్ను మెరుగుపరుచుకోవడం ఎవరికైనా కష్టమే" -పీవీ సింధు, స్టార్ షట్లర్
చివరగా మార్చిలో జరిగిన ఆల్ ఇంగ్లాండ్ ఓపెన్లో సింధు ఆడింది. ఆ తర్వాత లాక్డౌన్ వల్ల ఇంట్లోనే ఉండిపోయింది. ఈ సమయంలో పెయింటింగ్, వంట చేయడంలో ప్రావీణ్యం తెచ్చుకుంది.
