సూపర్స్టార్ మహేశ్ బాబు హీరోగా.. పరశురామ్ దర్శకత్వంలో తెరకెక్కబోతున్న చిత్రం 'సర్కారు వారి పాట'. 'సరిలేరు నీకెవ్వరు' బిగ్గెస్ట్ హిట్ తర్వాత వస్తున్న ఈ చిత్రంలో మహేశ్ సరికొత్త లుక్లో కనిపించనున్నారు. లాక్డౌన్ కారణంగా ఈ సినిమా చిత్రీకరణ ఇంతవరకు ప్రారంభంకాలేదు. తాజాగా ఆంక్షలు సడలించినప్పటికీ.. మహేశ్ మాత్రం షూటింగ్ విషయంలో తొందరపడకూడదని నిర్ణయించుకున్నారట.
తాజాగా ఈ చిత్ర కథాంశంపై ఆసక్తికర వార్తలు వినిపిస్తున్నాయి. మహేశ్ ఈ సినిమాలో ఓ బ్యాంక్ మేనేజర్ పాత్రను పోషిస్తున్నారని సమాచారం. దేశంలో విజయ్ మాల్యా వంటి అతిపెద్ద రుణ ఎగవేతదారులలో ఒకరిని తిరిగి స్వదేశానికి తీసుకొచ్చే నేపథ్యంలో మూవీ రూపొందుతోందట. ఫ్లాష్ బ్యాక్లో ఛేజింగులు, యాక్షన్ తదితర సన్నివేశాల కోసం భారతీయ, హాలీవుడ్ సాంకేతిక నిపుణులు పని చేయనున్నట్లు తెలుస్తోంది.
చిత్రబృందం ప్రీ ప్రొడక్షన్ పనులపై ఇప్పటికే దృష్టి పెట్టిందట. ప్రస్తుతమున్న పరిస్థితుల్లో విదేశాల్లో షూటింగ్ సాధ్యం కాదు కాబట్టి స్థానిక ప్రదేశాల్లో చిత్రీకరణ జరిపేందుకు ప్రణాళిక రచిస్తున్నట్లు తెలుస్తోంది. వచ్చే ఏడాది జులైలో సినిమా విడుదల చేయాలని చిత్రబృందం భావిస్తున్నట్లు సమాచారం.
