టెలికాం రంగంలో పరిశోధన, అభివృద్ధి (ఆర్&డీ) విభాగానికి పెట్టుబడులు పెరగాలని టెలికాం నియత్రణ సంస్థ 'ట్రాయ్' ఛైర్మన్ పీడీ వాఘేలా అన్నారు. దేశీయ, ప్రపంచ టెలికాం అవసరాలు తీర్చేందుకు భారత ఐటీ పరిశ్రమ సామర్థ్యాలను పెంచాల్సిన అవసరముందన్నారు. టెలికాం రంగంలో 'ఆత్మ నిర్భర్ భారత్' సాకారానికి ఇవి తోడ్పడతాయని పేర్కొన్నారు.
15వ డిజిటల్ ఇండియా సదస్సులో ఈ సూచనలు చేశారు వాఘేలా.
మొబైల్, బ్రాడ్బ్యాండ్, డిజిటల్ ఆటోమేషన్లు వృద్ధి చెందుతున్న తరుణంలో.. దేశీయ టెలికాం ఉత్పత్తులను ప్రోత్సహించాలని కూడా సూచించారు వాఘేలా. డేటా వినియోగం పెరుగుతున్న విషయాన్ని ఎత్తి చూపుతూ.. డిజిటల్ స్వావలంబన సాధించడంలో డేటా సెంటర్లకూ సమాన ప్రాధాన్యం ఉంటుందని చెప్పారు.
'డిజిటల్ విభాగంలో గత ఆరేడేళ్లుగా భారత్ వేగంగా వృద్ధి చెందుతోంది. ఇంకా సాధించాల్సింది చాలా ఉంది. స్వావలంబన కోసం మనమంతా కలిసి పని చేయాల్సిన అవసరముంది. ప్రస్తుతం ఎదుర్కొంటున్న సవాళ్లను దాటుకునేందుకు ప్రభుత్వం, పరిశ్రమలు, విద్యాసంస్థలు ఏకతాటిపైకి రావాలి.' అని వాఘేలా పిలుపునిచ్చారు.
ఇదీ చూడండి:పెరిగిన బంగారం, వెండి ధరలు
