ప్రస్తుత కాలంలో స్మార్ట్ ఫోన్ ప్రతి ఒక్కరి జీవితంలో భాగమైంది. చేతిలో ఫోన్ లేనిదే రోజు గడవని పరిస్థితి నెలకొంది. మిలీనియం జనరేషన్గా పిలుచుకునే నేటితరం యువతకు అయితే పొద్దున్న లేచింది మొదలు.. నిద్రపోయే వరకు చేతిలో ఫోన్ ఉండాల్సిందే. ఎంతలా అంటే ఇంటా బయట ఎక్కడ ఉన్నాసరే.. 'నా ఫోనే నా ప్రపంచం' అనుకునేంతలా సమాజం మార్పు చెందింది. అయితే ఫోన్ వల్ల వచ్చే లాభానష్టాల గురించి పక్కన పెడితే.. దాన్ని పాడవకుండా చూసుకోవడం పెద్ద టాస్క్ అని చెప్పవచ్చు. చాలా మంది తెలియక చేసే తప్పుల కారణంగా ఎంతో ఇష్టంగా కొనుక్కున్న స్మార్ట్ ఫోన్ జీవిత కాలాన్ని చేజేతులా పాడుచేసుకుంటారు. అయితే ఈ సింపుల్ టిప్స్ పాటిస్తే మీ స్మార్ట్ ఫోన్ లైఫ్ టైమ్ను పెంచుకోవచ్చు. మరి వాటిపై ఓ లుక్కేద్దామా..!
మంచి రక్షణ ఉత్పత్తులను ఎంచుకోవడం..
సాధారణంగా ఎంత ఖరీదైన స్మార్ట్ ఫోన్ అయినా సరే.. దాని టచ్స్క్రీన్లు చాలా సున్నితంగా ఉంటాయి. వీటికి ఏ చిన్న వస్తువు తగిలినా సరే గీతలు పడే అవకాశం ఎక్కువగా ఉంటుంది. కొన్ని సార్లు తక్కువ ఎత్తుల నుంచి కిందపడినా సరే.. డిస్ప్లే పూర్తిగా ధ్వంసం అవుతుంది. కొన్నిసార్లు టచ్ పనిచేయక పోవడం కూడా జరుగుతుంది. అందరికీ ఎక్కువగా ఎదురయ్యే ఈ సమస్యను అధిగమించాలంటే.. కొత్త ఫోన్ కొన్నాం అనే తొందర్లో ఏదో ఒక టెంపర్డ్ గ్లాస్ను కాకుండా నాణ్యమైన, డబుల్ లేయర్లు కలిగి ఉన్న గొరిల్లా గ్లాస్ ప్రొటెక్టర్లను ఎంచుకోవాలి. అలాంటివి వినియోగించినప్పుడే.. ఫోన్ కిందపడినా సరే పైన ఉన్న టెంపర్డ్ గ్లాస్ పాడవుతుందే కానీ.. డిస్ప్లేకు ఏం కాదు. ఇది తక్కువ ఖర్చుతో కూడుకున్నది కూడా.
దీంతో పాటుగా మొబైల్ కిందపడినప్పుడు స్క్రీన్తో పాటుగా డ్యామేజ్ అయ్యే మరో పార్ట్.. ఫోన్ వెనుక భాగం. బ్యాక్ పార్ట్ పగిలినప్పుడు చాలా సార్లు లోపల భాగాలు కూడా పాడయ్యే ప్రమాదం ఉంటుంది. అందుకే దీన్ని చాలా జాగ్రత్తగా చూసుకోవాలి. దీన్ని సురక్షితంగా కాపాడుకోవడానికి చుట్టూ కప్పి ఉంచే మొబైల్ కేస్(బ్యాక్ పౌచ్)లను ఎంచుకోవాలి. ప్రస్తుతం కొంచెం డబ్బులు పెడితే చాలు మనకి నచ్చిన కేస్లు, పౌచ్లు మార్కెట్లో అందుబాటులో ఉన్నాయి.
ఆ సమయంలో అసలు ఛార్జ్ వద్దే వద్దు..
చాలా మందికి పగలంతా ఫోన్ చేతిలో ఉన్నందున.. ఛార్జింగ్ పెట్టే అవకాశమే ఉండదు. దీంతో వారు రాత్రి నిద్రపోయే ముందు ఫోన్కు ఛార్జింగ్ పెడుతుంటారు. ఇలా చేయడం వల్ల సమయం కలిసి వచ్చినా సరే.. ఫోన్పై మాత్రం తీవ్ర ప్రభావం పడుతుంది. ప్రస్తుతం మార్కెట్లో ఉన్న ఫోన్లు దాదాపు గంట నుంచి రెండు గంటలు ఛార్జ్ చేస్తే చాలు బ్యాటరీ ఫుల్ అవుతాయి. దీనికోసం రాత్రంతా ఫోన్కు ఛార్జింగ్ పెట్టాల్సిన అవసరం లేదు. అలా బ్యాటరీని ఓవర్ ఛార్జింగ్ చేస్తే దాని పనితీరు క్షీణిస్తుంది. ఫలితంగా బ్యాటరీ ఉబ్బెత్తుగా తయారై.. త్వరగా పాడవుతుంది. వీలున్నంత వరకూ రాత్రంతా ఛార్జింగ్ పెట్టకుండా.. ఖాళీ సమయాల్లో బ్యాటరీని ఫుల్ చేసుకోవడం మంచిది.
ఎప్పటికప్పుడు OS అప్డేట్ చేస్తున్నారా..!
ఫోన్ పనితీరు మెరుగుపడడం.. బగ్స్ను తొలగించడం, కొత్త ఫీచర్లను జోడించడంలో ఆపరేటింగ్ సిస్టమ్ కీలక పాత్ర పోషిస్తుంది. ఫోన్ ఓఎస్ని అప్డేట్ చేయడం వల్ల కొత్త దానిలా తయారవుతుంది. దీంతో చాలా మంది ఫోన్లో తరచూ అప్డేట్లు చేస్తూ ఉంటారు. అయితే ఇది ఏ మాత్రం మంచిది కాదు. ఓఎస్ అనేది కొత్త మోడళ్లకు అనుగుణంగా ఉంటుంది. వాటిని దృష్టిలో పెట్టుకునే సంస్థలు వాటిని తయారు చేస్తాయి. దాదాపు మూడేళ్ల కాలం దాటిన ఫోన్ల్లో ఓఎస్ను అప్డేట్ చేయకపోవడం మంచిది. దీని వలన మన ఫోన్కు కలిగే లాభం కంటే నష్టమే ఎక్కువ. ఎలా అంటే పాత ఫోన్ సామర్థ్యాలు దాని హార్డ్వేర్పై ఆధారపడి ఉంటాయి. ప్రస్తుతం కొత్తగా వస్తున్న ఓఎస్లకు ఈ హార్డ్వేర్లు సపోర్ట్ చేయవు.. కావున ఫోన్ పనితీరు మెరుగుపడుతుందని అప్డేట్ చేయకపోవడమే మంచిది.
ఫోన్ పోర్ట్లను క్లీన్గా ఉంచుతున్నారా..!
మనం వెళ్లిన ప్రతి చోటికి ఫోన్ను తీసుకువెళ్తుంటాం. అది పార్టీ అయినా, దూర ప్రయాణమైనా మరేదైనా సరే ఫోన్ మన చేతిలో ఉండాల్సిందే. అలాంటప్పుడు ఫోన్ ఛార్జింగ్ పోర్ట్, ఆడియో ఫోర్ట్లలో దుమ్ము, ధూళి చేరుతుంది. ఇది ఛార్జింగ్, ఆడియో కనెక్షన్లలో రకరకాల సమస్యలను తెచ్చిపెడుతుంది. ఈ సమస్యలను రాకుండా ఉంటాలంటే.. దాదాపు నెలలో రెండు మూడుసార్లు అయినా సరే ఆ పోర్ట్లను క్లీన్ చేస్తూ ఉండాలి. అయితే వాటిని శుభ్రం చేసేటప్పుడు లిక్విడ్లను ఉపయోగించకుండా ఉండాలి. వాటిని యూజ్ చేస్తే లోపల భాగాలు దెబ్బతినే ప్రమాదం ఉంది.
ఆఫ్ చేయడం మర్చిపోవద్దు మిత్రమా..!
మనిషికైనా, యంత్రానికైనా సరే నిరంతరాయంగా పనిచేస్తే కాస్త విరామం అవసరం. అయితే మనం సంవత్సరంలో 365 రోజులూ వినియోగించే ఫోన్ కూడా ఓ యంత్రమేగా! దానికీ రెస్ట్ ఉండాలిగా..! మనకు అరచేతిలో ప్రపంచాన్ని చూపించే ఫోన్కు కూడా కాస్త విరామ సమయం అన్నది అవసరమే. అందుకే ఎప్పటికప్పుడు ఫోన్ను స్విచ్ఛాఫ్ చేస్తూ ఉండాలి. అలా చేసినప్పుడు దాని పనితీరు మెరుగుపడి.. ఎక్కువ కాలం పనిచేస్తుంది. మనకు ఫోన్తో అవసరం లేదనుకున్న కాస్త సమయమైనా దాన్ని స్విచ్ఛాఫ్ చేయడం మంచిది. సాధారణంగా మనం స్నానం, భోజనం, వ్యాయామం లాంటివి చేస్తున్నప్పుడు ఫోన్ను ఎక్కువగా వినియోగం కదా! అలాంటప్పుడు ఫోన్ను ఆఫ్ చేయడం ద్వారా.. ఫోన్ లైఫ్ టైమ్ను మెరుగుపరచుకోవచ్చు.
యాంటీ వైరస్ సాఫ్ట్వేర్లు ఉండాల్సిందే..!
ప్రస్తుతం కాలంలో కొందరు సైబర్ నేరగాళ్లు స్మార్ట్ ఫోన్లను లక్ష్యంగా చేసుకుని రకరకాల మోసాలకు పాల్పడుతున్నారు. దీనికోసం నేరగాళ్లు స్పైవేర్, ర్యాన్స్మ్వేర్, యాడ్వేర్ల ద్వారా రకరకాల మాల్వేర్లను ఫోన్లలోకి పంపించి.. డేటాని చోరీ చేసి డబ్బులు దోచేస్తున్నారు. అయితే ఈ సైబర్ మోసాల బారిన పడకుండా ఉండాలంటే.. అప్రమత్తంగా ఉండడమే కాకుండా ఫోన్లో యాంటీవైరస్ సాఫ్ట్వేర్లు కూడా ఉండాలి. అలాంటప్పుడే వారి బారిన పడకుండా ఉండడానికి వీలవుతుంది. దీంతోపాటుగా ఫోన్కు స్ట్రాంగ్ పాస్వర్డ్లతో పాటుగా ఫింగర్ప్రింట్ లాక్ కూడా పెట్టుకోవడం మంచిది. వీలున్నంత వరకూ ఫోన్లో సున్నితమైన సమాచారాన్ని నిల్వ చేసుకోకుండా ఉండాలి.
స్టోరేజ్ క్లియర్ చేస్తున్నారా..!
మనం రోజు తీసుకునే ఫొటోలు, వీడియోలతో పాటుగా నచ్చిన యాప్లను ఫోన్లో స్టోర్ చేస్తూనే ఉంటాం. ఇలా క్రమంగా స్టోర్ చేస్తూ ఉంటే.. ఫోన్ పనితీరుపై తీవ్ర ప్రభావం చూపుతుంది. ఫోన్లు యాప్స్ లోడ్ కావడానికి ఎక్కువ సమయం పట్టడమే కాకుండా.. వేడెక్కే అవకాశం కూడా ఉంటుంది. అయితే ఫోన్లో మనకు అవసరం లేని ఫైల్స్తో పాటుగా ఫొటోలు, వీడియోలు, యాప్స్లను ఎప్పటికప్పుడు డిలీట్ చేస్తూ ఉండాలి. దీంతో పాటుగా యాప్ స్టోరేజ్, క్యాచెస్ను కూడా క్లియర్ చేస్తూ ఉండాలి. ఫోన్లో ఎంత ఎక్కువ స్పేస్ ఉంటే అంత బాగా పనిచేస్తుంది.
