మరికొద్ది రోజుల్లో కర్ణాటకలో శాసనసభ ఎన్నికలు జరగనున్నాయి. అధికార బీజేపీ, ప్రతిపక్ష కాంగ్రెస్ నువ్వా-నేనా అన్న రీతిలో ప్రచారాన్ని రీతిలో హోరిత్తిస్తున్నాయి. ఈ సారి విజయాన్ని అందుకునేందుకు జేడీఎస్ పార్టీ కూడా తహతహలాడుతోంది. ఈ నేపథ్యంలో కీలక పరిణామం జరిగింది. జేడీఎస్ పార్టీకి మద్దతు పలికింది భారత్ రాష్ట్ర సమితి(బీఆర్ఎస్). కర్ణాటక-తెలంగాణ సరిహద్దులో నివసించే తెలుగు ఓటర్లను జేడీఎస్ వైపు మళ్లించేందుకు భారాస ఈ నిర్ణయం తీసుకున్నట్లు తెలుస్తోంది.
గతేడాది టీఆర్‌ఎస్.. బీఆర్ఎస్(భారత్ రాష్ట్ర సమితి)గా మారి జాతీయ పార్టీగా ఆవిర్భవించిన సమయంలో సీఎం కేసీఆర్కి మద్దతు తెలిపింది జేడీఎస్. అప్పట్లో జేడీఎస్ తమ మిత్రపక్షమని.. పొత్తులపై భవిష్యత్లో చర్చిస్తామని తెలిపారు తెలంగాణ ముఖ్యమంత్రి కేసీఆర్. ఈ క్రమంలో దేశ రాజకీయలతో పాటు కర్ణాటక రాజకీయాలపై కూడా చర్చించేందుకు కర్ణాటక మాజీ ముఖ్యమంత్రి హెచ్డీ కుమారస్వామి హైదరాబాద్ వచ్చి పలుమార్లు ముఖ్యమంత్రి కేసీఆర్తో సమావేశమయ్యారు. ఈ నేపథ్యంలో జేడీఎస్కు.. తెలంగాణ ముఖ్యమంత్రి కేసీఆర్ మద్దతు ప్రకటించారు.
జాతీయ రాజకీయాల్లో రాణించాలని ఉవ్విళ్లూరుతున్న బీఆర్‌ఎస్ను కర్ణాటక అసెంబ్లీ ఎన్నికల్లో తెలుగు ఓటర్లు ఎక్కువగా ఉన్న ప్రాంతాల్లో పోటీ చేయాలని కోరారు కుమారస్వామి. కర్ణాటక-తెలంగాణ సరిహద్దులోని జిల్లాల్లో బీఆర్ఎస్ తమ అభ్యర్థులను బరిలోకి దింపనుందని అప్పట్లో ప్రచారం జరిగినా.. ఈ నిర్ణయాన్ని వెనక్కి తీసుకుంది బీఆర్ఎస్ పార్టీ. అయితే తాజాగా ముఖ్యమంత్రి కేసీఆర్.. జేడీఎస్కు మద్దతు తెలపడం వల్ల ఈ ప్రచారానికి బ్రేక్ పడింది.
కర్ణాటక-తెలంగాణ సరిహద్దు జిల్లాల్లో జేడీఎస్ తరఫున సీఎం కేసీఆర్ ప్రచారం చేయనున్నారు. బీఆర్ఎస్ పార్టీ విస్తరణ వ్యూహంలో భాగంగా తెలంగాణ సరిహద్దులోని కళ్యాణ కర్ణాటకలోని కొన్ని జిల్లాలపై గులాబీ పార్టీకి కొంత పట్టున్న నేపథ్యంలో జేడీఎస్-బీఆర్ఎస్ల దోస్తీ ఏ మేరకు ఫలితాలనిస్తుందో మే 13న తేలిపోనుంది. వచ్చే ఏడాది జరగనున్న లోక్సభ ఎన్నికలకు కేసీఆర్ నేతృత్వంలోని బీఆర్ఎస్ సిద్ధమవుతోంది. ఇందుకోసం ఇప్పటికే జేడీఎస్తో మంచి సంబంధాలు కొనసాగిస్తోంది.
కొత్త పథకాలతో ప్రజలు ముందుకు..
ఇప్పటికే తెలంగాణలో అమలవుతున్న రైతు బంధు, రైతు బీమా, 24 గంటల ఉచిత కరెంట్ వంటి పథకాలను అమలు చేస్తామంటూ కర్ణాటకలో ప్రచారం చేస్తోంది జేడీఎస్. 2018లో జరిగిన ఎన్నికల్లో కర్ణాటక-తెలంగాణ సరిహద్దు జిల్లాల్లో దక్షిణ బీదర్, గుర్మత్కల్, మాన్వి, సింధనూర్ సహా నాలుగు నియోజకవర్గాల్లో కుమారస్వామి పార్టీ విజయం సాధించింది. వీటితో పాటు బీఆర్ఎస్ మద్దతుతో మరిన్ని నియోజకవర్గాల్లో కూడా గెలవాలనే వ్యూహంతో ముందుకెళ్తోంది.
కర్ణాటకలోని బీదర్, బళ్లారి, రాయచూర్, కొప్పల్, గంగావతి, యాదగిరి, కలబురగి, చిక్కబళ్లాపూర్, బాగేపల్లి, గౌరిబిదనూరు, కోలార్, చింతామణి జిల్లాలు తెలంగాణతో సరిహద్దును పంచుకుంటున్నాయి. ఈ జిల్లాల్లోని 41 అసెంబ్లీ నియోజకవర్గాల్లో 30 స్థానాల్లో తెలుగు మాట్లాడేవారి సంఖ్య అధికంగా ఉంది. ఈ నేపథ్యంలో ఈ ప్రాంతాల్లో కేసీఆర్తో ప్రచారం చేయిస్తే లాభపడొచ్చనేది జేడీఎస్ వ్యూహమని రాజకీయ విశ్లేషకులు చెబుతున్నారు.
జేడీఎస్ తరఫున దీదీ ప్రచారం..
మరోవైపు బంగాల్ ముఖ్యమంత్రి మమతా బెనర్జీ కూడా జేడీఎస్ తరఫున ప్రచారం చేయనున్నారు. కొద్ది రోజుల క్రితం కర్ణాటక మాజీ ముఖ్యమంత్రి హెచ్డీ కుమారస్వామి.. మమతా బెనర్జీని కోల్కతాలో కలిశారు. ఈ సందర్భంగా ఎన్నికల ప్రచారానికి రావాలని మమతను కుమారస్వామి ఆహ్వానించారు.
