సంతోషంగా వెళ్లి... విషాదంతో తిరిగి వచ్చారు

తమ ఇంటికి వచ్చిన బంధువులతో ఓ కుటుంబం సరదాగా ఓ వాగుకు వెళ్లారు. ఈ నేపథ్యంలో అక్కడ ఒక్కసారిగా విషాదం చోటుచేసుకుంది. స్నానం కోసం వెళ్లిన ఇద్దరు పిల్లలు తిరిగిరాని లోకాలకు చేరారు. లోతు గమనించక వాగులోకి వెళ్లి మృత్యువాత చెందారు. ఈ ఘటన ములుగు జిల్లాలో జరిగింది.

ములుగు జిల్లా తాడ్వాయి మండలం మేడారం జంపన్న వాగులో ఈతకు వెళ్లిన ఇద్దరు చిన్నారులు మృతి చెందారు. జాహ్నవి(11), హేమంత్(9) మేడారానికి చెందిన సంపత్ రెడ్డి-అనితల పిల్లలు. భూపాలపల్లి జిల్లాకు చెందిన తమ బంధువులు ఇంటికి రావడంతో కలిసి ఊరట్టం బ్రిడ్జికి పర్యటకానికి వెళ్లారు.

ఈ తరుణంలో వాగులో ప్రవహిస్తున్న నీటిలో స్నానం చేసేందుకు బంధువుల పిల్లలతో కలిసి జాహ్నవి, హేమంత్ ఈతకు వెళ్లారు. లోతును గమనించకుండా జాహ్నవి ఒకసారి మునిగిపోయిందని.. కాసేపట్లో ఆమె వెనకాలే హేమంత్ కనిపంచకుండా పోయాడని బంధువులు వాపోయారు. సంపత్ రెడ్డి-అనితల ఇద్దరు పిల్లలు వాగులో మునిగి మరణించడం వల్ల తల్లిదండ్రులు బోరున విలపించారు. ఈ ఘటనతో ఆ గ్రామంలో విషాదఛాయలు అలుముకున్నాయి.

ఇదీ చూడండి : కరడుగట్టిన నేరస్థుడు బాఖర్‌ అలీ అరెస్టు