దొంగనోట్ల చెలామణికి పాల్పడుతున్న ఓ వ్యక్తిని అరెస్టు చేసినట్లు సంగారెడ్డి డీఎస్పీ బాలాజీ వెల్లడించారు. జిల్లాలోని అల్లదుర్గ్ గ్రామానికి చెందిన ఉప్పరి ప్రసాద్ గతంలోనూ నకిలీ నోట్ల చెలామణి కేసులో నిందితుడేనని పేర్కొన్నారు. అతని వద్ద నుంచి కారు, తొమ్మిది రెండువేల దొంగనోట్లను స్వాధీనం చేసుకున్నారు.
ఈ నెల 7వ తేదీన విజయనగర్ కాలనీలోని ఓ షాపులో నకిలీ రెండువేల నోటుతో 200 రూపాయలు కొనుగోలు చేసి రూ.1800 నగదును తీసుకెళ్లినట్లు షాపు యజమాని పోలీసులకు ఫిర్యాదు చేశాడు. కేసు నమోదు చేసిన పోలీసులు దర్యాప్తు ప్రారంభించారు.
గతంలో మిగిలిన నోట్లు మారుస్తూ..
ఇంతకుముందు ఇలాంటి కేసులోనే బెయిల్పై బయటకు వచ్చిన నిందితుడు మిగిలిన నకిలీ నోట్లను చెలామణి చేస్తున్నాడు. నిందితున్ని అరెస్ట్ చేసిన పోలీసులు కోర్టులో హాజరు పరచనున్నట్లు వెల్లడించారు. ఎవరైనా ఇలాంటి కార్యకలాపాలకు పాల్పడితే కఠిన చర్యలు తప్పవని డీఎస్పీ బాలాజీ హెచ్చరించారు.
