Poland plane crash : పోలండ్లో జరిగిన విమాన ప్రమాదంలో ఐదుగురు ప్రాణాలు కోల్పోయారు. ఎనిమిది మందికి గాయాలయ్యాయి. 'సెస్నా 208' అనే విమానం స్కైడైవింగ్ సెంటర్లోని హ్యాంగర్పైకి దూసుకెళ్లడం వల్ల ప్రమాదం జరిగింది. వాతావరణం అనుకూలించకపోవడం వల్ల ప్రమాదం జరిగిందని అధికారులు తెలిపారు.
నోవీ డవార్ రాష్ట్రం, గిమినా నాసియెల్స్క్ జిల్లాలోని క్రిసినో గ్రామంలో ఈ ప్రమాదం జరిగింది. ఘటనలో ప్లేన్ పైలట్ ప్రాణాలు కోల్పోయాడని అధికారులు తెలిపారు. వాతావరణం సరిగా లేదని హ్యాంగర్లో తలదాచుకున్న నలుగురు సైతం ఈ ప్రమాదంలో చనిపోయారని చెప్పారు. ఘటనలో ఎనిమిది మందికి గాయాలు కాగా, అందులో ఇద్దరి పరిస్థితి విషమంగా ఉందని వివరించారు. గాయపడిన వారిలో ఓ చిన్నారి సైతం ఉందని గవర్నర్ సిల్వెస్టర్ డాబ్రోవ్స్కీ తెలిపారు.
ప్రమాదం జరిగిన ప్రాంతమైన క్రిసినో పోలండ్ రాజధాని వార్సాకు 45 కిలోమీటర్ల దూరంలో ఉంది. ఘటన గురించి సమాచారం అందగానే వెంటనే అంబులెన్సులు, అగ్నిమాపక యంత్రాలు ఆ ప్రాంతానికి చేరుకున్నాయి. క్షతగాత్రులను బయటకు తీసి ఆస్పత్రికి తరలించాయి. ఇంకెవరైనా బాధితులు ఉన్నారేమోనన్న అనుమానంతో హ్యాంగర్ను పూర్తిగా తనిఖీ చేస్తున్నట్లు పోలీసులు తెలిపారు. ప్రమాదానికి గల పూర్తి కారణాలు ఇంతవరకు తెలియలేదు. అధికారులు దీనిపై దర్యాప్తు జరుపుతున్నారు.
2014లోనూ పోలండ్లో స్కైడైవింగ్ ప్లేన్ ఒకటి ప్రమాదానికి గురైంది. టోప్లోలో జరిగిన ఆ నాటి ఘటనలో 11 మంది ప్రాణాలు కోల్పోయారు. ఆ తర్వాత జరిగిన ఘోర దుర్ఘటన ఇదేనని అధికారులు వెల్లడించారు.
నేపాల్ ప్రమాదంలో 70 మంది మృతి
కాగా ఈ ఏడాది ప్రారంభంలో నేపాల్లో ఘోర విమాన ప్రమాదం జరిగింది. పొఖారా అంతర్జాతీయ విమానాశ్రయంలోని రన్వేపై ల్యాండ్ అవుతుండగా యతి ఎయిర్ లైన్స్‌కు చెందిన ఓ విమానం అదుపుతప్పి నదిలోయలోకి దూసుకెళ్లింది. ఈ ప్రమాదంలో 70 మందికి పైగా ప్రాణాలు కోల్పోయారు. ఇంజిన్ వైఫల్యం కారణంగానే ఈ ప్రమాదం జరిగిందని దర్యాప్తులో తేలింది. పాత విమానాశ్రయానికి.. పొఖారా అంతర్జాతీయ విమానాశ్రయానికి మధ్య ఈ ప్రమాదం జరిగింది. ప్రమాద సమయంలో విమానంలో ఉన్న 72 ప్రయాణికుల్లో 15 మంది విదేశీయులు ఉన్నారు. అందులో ఐదుగురు భారతీయులు ఉన్నట్లు అధికారులు గుర్తించారు. ఈ ప్రమాదానికి సంబంధించిన చిత్రాల కోసం ఈ లింక్పై క్లిక్ చేయండి. ఈ ఘటన లైవ్ వీడియో కోసం ఈ లింక్ను క్లిక్ చేయండి.
