America GunShoot: అగ్రరాజ్యం అమెరికాలో తుపాకీ గర్జనలు కొనసాగుతూనే ఉన్నాయి. తాజాగా ఓ ఇంట్లో తనిఖీ చేసేందుకు వెళ్లిన పోలీసులపై దుండగుడు ఒక్కసారిగా కాల్పులకు తెగబడ్డాడు. ఫ్లాయిడ్ కౌంటీలోని కెంటుకీ ప్రాంతంలో ఈ ఘటన జరిగింది. కాల్పుల్లో ముగ్గురు పోలీసులు చనిపోయారు. వారితోపాటు ఓ జాగిలం కూడా ప్రాణాలు కోల్పోయింది. ఒక్కసారిగా అగంతకుడి కాల్పులతో అప్రమత్తమయ్యారు అమెరికా పోలీసులు. వెంటనే బ్యాకప్ కోసం ఉన్నతాధికారులకు సమాచారం ఇచ్చారు. అనంతరం ఇంట్లోకి ప్రవేశించి.. నిందితుడు 49ఏళ్ల లాన్స్ స్టోర్జ్ను అదుపులోకి తీసుకున్నారు. అగంతకుడు నేరాన్ని అంగీకరించినట్లు అధికారులు తెలిపారు. అతడిపై పలు సెక్షన్ల కింద కేసు నమోదు చేసినట్లు వివరించారు.
అమెరికాలో ఇటీవల కాల్పుల ఘటనలు ఎక్కువగా జరుగుతున్నాయి. జూన్15న మెక్సికోలో పోలీసులు, సైనికులు, సాయుధుల మధ్య జరిగిన కాల్పుల్లో పది మంది సాయుధులు మృతిచెందగా ముగ్గురు డిటెక్టివ్లు సహా నలుగురు గాయపడ్డారు. అంతకుముందు, పశ్చిమ మేరీల్యాండ్లోని కొలంబియా మెషీన్ అనే కంపెనీలోకి చొరబడ్డ దుండగుడు.. తుపాకీతో కాల్పులు జరిపాడు. ఈ ఘటనలో ముగ్గురు చనిపోయారు. ఫిలడెల్ఫియాలోని వారాంతపు మార్కెట్లో జరిగిన కాల్పుల్లో ముగ్గురు ప్రాణాలు కోల్పోయారు. మరో 11 మంది తీవ్రంగా గాయపడ్డారు. సౌత్ స్ట్రీట్లో జనసందోహంపైకి దుండగులు కాల్పులు జరపటం వల్ల భారీ నష్టం జరిగింది.
ఇవీ చదవండి: భారీ భూకంపం..రిక్టర్ స్కేల్పై 6.3 తీవ్రత.. ఐదుగురు మృతి
