Russia Ukraine conflict: ఉక్రెయిన్ మిలిటరీ ఉన్నతాధికారులపై శనివారం సాయంత్రం బాంబు దాడి జరిగింది. తూర్పు ఉక్రెయిన్లోని వేర్పాటువాదుల యుద్ధ ప్రాంతంలో పర్యటన సందర్భంగా ఈ దాడి జరిగినట్లు అసోసియేటెడ్ ప్రెస్ తెలిపింది. ఈ క్రమంలో అధికారులు బాంబు షెల్టర్లోకి పరుగులు పెట్టినట్లు వారితో ఉన్న అసోసియేటెడ్ ప్రెస్ జర్నలిస్ట్ వెల్లడించారు.
అంతకుముందు తూర్పు ఉక్రెయిన్లోని రష్యా మద్దతు గల రెండు వేర్పాటువాద ప్రాంతాల నాయకులు తమ బలగాలను సమీకరించాలని ఆదేశాలు జారీ చేశారు. రెబల్ ప్రాంతంలో జరుగుతున్న హింసను కారణంగా చూపి రష్యా దాడికి పాల్పడే అవకాశం ఉందన్న భయాల నేపథ్యంలో ఈ ప్రకటన ప్రాధాన్యం సంతరించుకుంది.
తూర్పు ఉక్రెయిన్లోని ప్రభుత్వం రెండుసార్లు మోర్టార్ షెల్స్ ప్రయోగించినట్లు, అవి సరిహద్దు సమీపంలో పడినట్లు రష్యా శనివారం ఉదయం తెలిపింది. అయితే.. దీనిని ఉక్రెయిన్ విదేశాంగ మంత్రి మైత్రో కులెబా తోసిపుచ్చారు. అది ఒక తప్పుడు ప్రకటనగా పేర్కొన్నారు. మరోవైపు.. డొనెట్స్క్ ప్రాంతంలోని వేర్పాటువాద దళాలు చేసిన దాడిలో ఓ సైనికుడు ప్రాణాలు కోల్పోయినట్లు ఉక్రెయిన్ మిలిటరీ పేర్కొంది. రెచ్చగొట్టే చర్యల్లో భాగంగా నివాస ప్రాంతాల్లో ఆయుధాలను మోహరిస్తున్నట్లు ఆరోపించింది.
ఇదీ చూడండి: రష్యా క్షిపణి పరీక్షలు.. ఉక్రెయిన్ సరిహద్దులో హైటెన్షన్
