పాకిస్థాన్కు చెందిన తెహ్రీక్-ఏ-తాలిబన్ ఉగ్రసంస్థ నాయకుడు నూర్ వాలి మెహ్సుద్ను అంతర్జాతీయ ఉగ్రవాదిగా ప్రకటించింది ఐక్యరాజ్యసమితి. అల్ఖైదా తీవ్రవాద సంస్థకు ఆర్థిక సాయం సహా ఇతర కార్యకలాపాల్లో పాల్గొన్నందుకు అతడిపై చర్యలకు ఉప్రక్రమించింది.
గురువారం నుంచి మెహ్సుద్పై ఆర్థిక, పర్యటక ఆంక్షలు విధిస్తున్నట్లు ఐక్యరాజ్యసమితి భద్రతా మండలి, అల్ఖైదా ఆంక్షల కమిటీ ప్రకటించాయి. అతడి ఆస్తులు స్తంభింపచేసి ఆయుధాలు, విదేశీ ప్రయాణాలపై నిషేధం విధిస్తున్నట్లు తెలిపింది.
2018లో మౌలానా ఫజాలుల్లా మృతి చెందినప్పటి నుంచి తాలిబన్ల నాయకుడిగా వ్యవహరిస్తున్నాడు మెహ్సుద్. తెహ్రీక్-ఏ-తాలిబన్ పాకిస్థాన్ సంస్థను 2011 జులై 29న బ్లాక్లిస్ట్లో చేర్చింది ఐరాస.
మెహ్సుద్ నాయకత్వంలో తాలిబన్ ఉగ్ర సంస్థ భయానక దాడులకు పాల్పడినట్ల అల్ఖైదా ఆంక్షల కమిటీ తెలిపింది. పాకిస్థాన్లో పలు చోట్ల సహా, ఆ దేశ బలగాలను లక్ష్యంగా చేసుకుని గతేడాది జులై, ఆగస్టులో ఘాతుకాలకు పాల్పడినట్లు పేర్కొంది.
2010 మేలో టైమ్స్ స్క్వేర్లో జరిగిన బాంబు దాడి, అదే ఏడాది ఏప్రిల్లో పెషావర్లోని అమెరికా కాన్సులేట్పై జరిగిన దాడులకు పాల్పడింది తాలిబన్ సంస్థే. మెహ్సుద్ను బ్లాక్లిస్ట్లో చేర్చడాన్ని అమెరికా స్వాగతించింది.
