తాలిబన్ల పాలనలో బాలికలు, మహిళలు ఇళ్లకే పరిమితమయ్యే ప్రమాదం ఉందని సర్వత్రా ఆందోళన నెలకొంది(taliban girls education). ఈ ఆందోళనలకు మరింత బలం చేకూర్చే విధంగా తాలిబన్లు ఓ నిర్ణయం తీసుకున్నారు. 6-12 తరగతుల అబ్బాయిలు, పురుష ఉపాధ్యాయులు శనివారం నుంచే క్లాసులకు హాజరుకావాలని ఆదేశిస్తూ ఓ ప్రకటన విడుదల చేసింది విద్యాశాఖ.
శుక్రవారం ఈ ప్రకటన ఫేస్బుక్లో దర్శనమిచ్చింది. అబ్బాయిల గురించే ఇందులో ఉంది. అమ్మాయిల గురించి ఎలాంటి ప్రకటన లేదు(taliban education news). మార్గదర్శకాల్లోనూ వారి ప్రస్తావన లేకపోవడం.. బాలికలు, మహిళలపై కఠిన ఆంక్షలు ఉంటాయన్న వాదనలకు మరింత ఊతమిస్తోంది.
గత తాలిబన్ల పాలనలో ఇటువంటి కఠిన వైఖరే ఉండేది. అయితే అప్పుడు కనీసం 1-6 తరగతుల బాలికలను చదువుకోనిచ్చేవారు. ఆ తర్వాత పాఠశాలలు, పని ప్రదేశాల్లోకి వారికి అనుమతులు లేవు. అఫ్గాన్లోని కొన్ని రాష్ట్రాల్లో అనేకమంది మహిళలు ఇప్పటికీ ఇళ్లకే పరిమితమయ్యారు. ఆసుపత్రి, విద్య, ఆరోగ్యశాఖలో పనిచేసే కొందరికి మాత్రమే అనుమతులుండేవి.
వైద్యులు, ప్రభుత్వ ఉద్యోగులు విలవిల...
అమెరికా దళాలు వైదొలగకముందే.. ఆగస్టు 15న కాబుల్పై జెండా ఎగరేశారు తాలిబన్లు. ఫలితంగా ఆ దేశం సంక్షోభంలోకి కూరుకుపోయింది. దేశాన్ని వీడేందుకు ప్రజలు పోటీపడి కాబుల్ విమానాశ్రయం వద్ద బారులుతీరారు. పలువురు దేశాన్ని విడిచిపెట్టి వెళ్లిపోగా.. అనేకమంది అక్కడే ఉండిపోయారు. కొన్ని రోజుల అనంతరం దేశంలో ఆపద్ధర్మ ప్రభుత్వాన్ని ఏర్పాటు చేశారు తాలిబన్లు.
మరోవైపు అఫ్గానిస్థాన్లో ఆర్థిక సంక్షోభం రోజురోజుకు ముదురుతోంది(afghan crisis 2021). తాలిబన్ల ఆక్రమణతో అంతర్జాతీయ సమాజం నుంచి రావాల్సిన నిధులకు ఆటంకం ఏర్పడి.. అక్కడి ప్రజలు విలవిలలాడుతున్నారు. ముఖ్యంగా వైద్యులు, ఆరోగ్య నిపుణులు.. జీతాలు అందక దయనీయ జీవితాన్ని గడుపుతున్నారు. వైద్య పరికరాలు, మందుల కొరత కారణంగా రోగులు చావుబతుకుల మధ్య కొట్టుమిట్టాడుతున్నారు.
రోగుల ఆర్తనాథాలను వైద్యులు తట్టుకోలేకపోతున్నారు(afghan hospital kabul). తమను అంతర్జాతీయ సమాజం విస్మరించకూడదని.. తక్షణమే సహాయం చేయాలని వేడుకుంటున్నారు.
ప్రభుత్వ ఉద్యోగులది కూడా ఇదే దుస్థితి. అనేక ప్రభుత్వ కార్యాలయాలు నెల రోజులుగా మూతపడే ఉన్నాయి. అందువల్ల ఉద్యోగులకు జీతాలు అందడం లేదు. తిరిగి ఉద్యోగాల్లో చేరాలని తాలిబన్లు పిలుపునిచ్చినా, వేతనాలు, తాలిబన్ల పాలనపై అందరిలో ఆందోళన నెలకొంది.
అటు కాబుల్లోని(kabul news latest) ఏటీఎంల వద్ద రద్దీ ఇంకా కొనసాగుతోంది. ఏటీఎం నుంచి డబ్బులు తీసుకోడానికి ప్రజలు రోజూ బారులు తీరుతున్నారు. కానీ వారికి ప్రతిసారీ నిరాశే ఎదురవుతోంది. ఇన్నేళ్లు కష్టపడి కూడబెట్టుకున్న సొమ్మంతా పోయిందని ఆవేదన చెందుతున్నారు.
ఇదీ చూడండి:-
