ప్రపంచ దేశాల్లో కరోనా వైరస్ విజృంభిస్తోంది. ప్రపంచవ్యాప్తంగా ఇప్పటివరకు 3కోట్ల 84 లక్షల 49వేల 649 కేసులు నమోదయ్యాయి. 10లక్షల 92వేల 252మంది కరోనాతో ప్రాణాలు కోల్పోయారు. మరో 2కోట్ల 88లక్షల 94వేల 655మంది కరోనాను జయించారు.
ఈ ఏడాది తొలినాళ్లలో వైరస్ ధాటికి గడగడలాడిన దేశాల్లో కేసుల సంఖ్య మళ్లీ పెరుగుతుండటం అధికారులను తీవ్ర ఆందోళనకు గురిచేస్తోంది. రష్యా, ఇరాన్, బ్రిటన్లో రికార్డు స్థాయిలో వైరస్ కేసులు నమోదవుతున్నాయి.
రష్యాలో...
రష్యాలో తాజాగా 14,230కేసులు బయటపడ్డాయి. ఆ దేశంలో కరోనా విజృంభించినప్పటి నుంచి ఇవే ఒక్కరోజులో అత్యధిక కేసులని అధికారులు వెల్లడించారు. దేశంలో వరుసగా 11వ రోజు 10వేలకుపైగా కేసులు నమోదయ్యాయి. ఇప్పటివరకు 13లక్షల 40వేల 409మందికి వైరస్ సోకింది. 23వేల 205మంది మరణించారు.
ఇదీ చూడండి:- 'కరోనా నుంచి కోలుకుంటే.. ఐదు నెలలు సేఫ్!'
ఇరాన్లో...
ఇరాన్లో పరిస్థితులు భయానకంగా ఉన్నాయి. వారంలో వరుసగా మూడోసారి.. రికార్డు స్థాయిలో కరోనా మరణాలు వెలుగుచూశాయి. తాజాగా 279మంది మరణించారు. 4,830మందికి వైరస్ సోకింది.
దీంతో మొత్తం బాధితుల సంఖ్య 5లక్షల 13వేల 219కి చేరగా.. మరణాల సంఖ్య 29వేల 349కి పెరిగింది.
బ్రిటన్లో..
బ్రిటన్లో కేసుల సంఖ్య పెరుగుతున్న నేపథ్యంలో అధికార ప్రభుత్వంపై తీవ్ర స్థాయిలో ఒత్తిడి పెరుగుతోంది. దేశవ్యాప్తంగా తాత్కాలిక లాక్డౌన్ విధించినా బ్రిటన్లో కరోనా ఉద్ధృతి తగ్గడం లేదు. మొత్తం కేసుల సంఖ్య 6లక్షల 34వేల 920కి చేరింది. ఇప్పటివరకు 43,018 మరణాలు నమోదయ్యాయి.
జర్మనీలో..
జర్మనీలో తాజాగా 5వేలకుపైగా కరోనా కేసులు బయటపడ్డాయి. ఏప్రిల్ మధ్య వారం తర్వాత ఈ స్థాయిలో కేసులు వెలుగుచూడటం ఇదే తొలిసారి. దీంతో 16రాష్ట్రాల గవర్నర్లతో బుధవారం అత్యవసరంగా సమావేశమయ్యారు జర్మనీ ఛాన్స్లర్ ఏంజెలా మెర్కెల్. కరోనా కట్టడి వ్యూహాలను చర్చించారు.
ఇదీ చూడండి:- నన్ను క్షమించండి అంటూ 'కిమ్' కన్నీరు.!
