ప్రపంచవ్యాప్తంగా పలు దేశాల్లో వర్షాలు బీభత్సం సృష్టిస్తున్నాయి. చైనాలో కురిసిన భారీ వర్షాలకు 21 మంది ప్రాణాలు కోల్పోయారు. సెంట్రల్ చైనా హుబేయ్ ప్రాంతంలో నలుగురు గల్లంతైనట్లు అధికారులు వెల్లడించారు.
సుచియాన్ కౌంటీ లియులిన్ టౌన్షిప్లో బుధ, గురువారాల్లో 503 మిల్లీమీటర్ల వర్షపాతం నమోదైనట్లు అధికారులు పేర్కొన్నారు. 3.5 మీటర్ల లోతు మేర నీళ్లు నిలిచిపోయాయని స్పష్టం చేశారు.
8,000 మందిపై వర్షం ప్రభావం చూపిందని అధికారులు తెలిపారు. సహాయ చర్యలు ముమ్మరం చేసినట్లు వెల్లడించారు. ఈ నేపథ్యంలో సెంట్రల్ చైనాలోని కొన్ని ప్రాంతాల్లో ప్రమాద హెచ్చరికలు జారీ చేసింది చైనా వాతావరణ శాఖ.
హుబేయ్, అన్హుయి, హునన్, జియాంక్సి, జెజియాంగ్ ప్రాంతాల్లో శుక్రవారం భారీ వర్షాలు పడే అవకాశముందని వాతావారణ శాఖ హెచ్చరించింది. 200 మిల్లీమీటర్ల వర్షపాతం నమోదు కానుందని తెలిపింది.
గతనెల చైనాలో పోటెత్తిన వరదల కారణంగా 300 మంది ప్రాణాలు కోల్పోయారు, దాదాపు 50 మంది గల్లంతయ్యారు.
జపాన్ అతలాకుతలం..
భారీ వర్షాలకు జపాన్ అతలాకుతలం అవుతోంది. బురదతో కూడిన వరదల ధాటికి నలుగురు బలయ్యారు. మరో ఇద్దరు గల్లంతైనట్లు విపత్తు నిర్వహణ బృందం తెలిపింది.
క్యూషు, హిరోషిమా ప్రాంతాల్లో భారీగా వర్షపాతం నమోదయ్యే అవకాశముందని జపాన్ వాతావరణ శాఖ హెచ్చరించింది.
ఇదీ చదవండి:వరదల ధాటికి చైనాలో 302 మంది మృతి
