గతేడాది జూన్లో జరిగిన గల్వాన్ ఘర్షణకు సంబంధించిన ఓ వీడియోను చైనా విడుదల చేసింది. తొలుత భారత సైనికులే చొరబడినట్లు, తమ సైన్యం వారిని నిలువరించినట్లు చూపించే ప్రయత్నం చేసింది. రాత్రివేళ ఇరు సైన్యాలు ఫ్లాష్లైట్ల వెలుతురులో కేకలు వేసుకుంటున్న దృశ్యాలు ఆ వీడియోలో ఉన్నాయి.
అయితే.. ఇలాంటి దుష్ప్రచారాలు చేయటం చైనాకు వెన్నతో పెట్టిన విద్యగా సైనికవర్గాలు పేర్కొన్నాయి. పాంగాంగ్ సరస్సులో సైనిక ఉపసంహరణ తర్వాత ఇరుదేశాల మధ్య చర్చలు జరగనున్న నేపథ్యంలో.. గల్వాన్ ఘర్షణలో తమ సైనికులు మృతి చెందినట్టు అంగీకరించిన చైనా వ్యూహాత్మకంగానే ఈ వీడియోను విడుదల చేసినట్లుగా భావిస్తున్నారు.
గతేడాది మే నుంచి సరిహద్దులో భారత్తో కయ్యానికి కాలుదువ్వుతోంది చైనా. ఈ క్రమంలోనే జూన్లో పరిస్థితులు మరింత తీవ్రంగా మారాయి. గల్వాన్ లోయలో భారత సైనికులపై చైనా జవాన్లు దాడికి దిగారు. ప్రతిఘటించిన భారత్.. చైనాకు దీటుగా బదులిచ్చింది. ఈ ఘటన ప్రపంచ దేశాలను షాక్కు గురిచేసింది. అనంతరం సరిహద్దు ఉద్రిక్తతలను తగ్గించేందుకు భారత్-చైనా చర్చలు చేపట్టాయి.
ఇదీ చదవండి: 'గల్వాన్' మృతులపై తొలిసారి చైనా ప్రకటన
