తాలిబన్లపై(Afghan Taliban) ఐక్యరాజ్యసమితి భద్రతా మండలి(యూఎన్ఎస్సీ) తన అభిప్రాయాన్ని మార్చుకున్నట్లు కన్పిస్తోంది. అఫ్గానిస్థాన్లో క్షేత్రస్థాయి వాస్తవ పరిస్థితులే ఈ మార్పునకు కారణంగా తెలుస్తోంది. ఉగ్రవాదులపై ఆగస్టు 16న విడుదల చేసిన ఓ ప్రకటనలో తాలిబన్లను ప్రస్తావించిన ఐరాస.. ఆగస్టు 27 నాటి ప్రకటనలో మాత్రం తాలిబన్ల పదాన్ని తొలగించింది. తాలిబన్లు ప్రపంచానికి ముప్పు కాదని ఐరాస భద్రతా మండలి మొదటిసారి సూచన ప్రాయంగా ఈ ప్రకటన ద్వారా తెలియజేస్తోందని నిపుణులు భావిస్తున్నారు. ఆగస్టు మాసానికి యూఎన్ఎస్సీ ఛైర్మన్గా(UNSC Chairman) ఉన్న భారత్.. ఈ స్టేట్మెంట్పై ఏమాత్రం ఆలోచించకుండా సంతకం చేయడం గమనార్హం.
తాలిబన్లు అఫ్గానిస్థాన్ను ఆక్రమించుకున్న(Afghanistan Crisis) మరునాడు ఆగస్టు 16న ఐరాస భద్రతా మండలిలో(UNSC) భారత శాశ్వత రాయబారి టీఎస్ తిరుమూర్తి ఓ ప్రకటనను విడుదల చేశారు.
"అఫ్గానిస్థాన్లో ఉగ్రవాదానికి వ్యతిరేకంగా పోరాటం చేయాల్సిన ఆవశ్యకతను ఐరాస భద్రతా మండలి సభ్యులు మరోసారి పునరుద్ధాటిస్తున్నారు. ఉగ్రవాద దాడులకు, కార్యకలాపాలకు, ఇతర దేశాలను బెదిరించడం వంటి వాటికి అఫ్గాన్ కేంద్రం కాకూడదు. తాలిబన్లు గానీ, ఇతర ఏ వర్గం గానీ, వ్యక్తులు గానీ అఫ్గాన్ భూభాగం.. మరే ఇతర దేశాల్లోని ఉగ్రవాదులకు మద్దతుగా ఉండొద్దు." అని ప్రకటనలో పేర్కొన్నారు.
అయితే ఆగస్టు 27 విడుదల చేసిన ఇదే ప్రకటనలో తాలిబన్ పదాన్ని పూర్తిగా తొలగించింది యూఎన్ఎస్సీ.
దీనిపై యూఎన్ఎస్సీలో భారత మాజీ శాశ్వత రాయబారి సయ్యద్ అక్బరుద్ధీన్ స్పందించారు. 'దౌత్య విధానంలో రెండు వారాలంటే చాలా ఎక్కువ సమయం. ప్రకటనలో 'టీ'(తాలిబన్) పదం మాయమైపోయింది.' అని వ్యంగ్యంగా ట్వీట్ చేశారు.
తాలిబన్ల సహకారం వల్లే..
అఫ్గాన్లో ప్రస్తుత పరిస్థితులను గమనించే ఈ ప్రకటనపై సంతకం చేసినట్లు యూఎన్ఎస్సీ అధికారులు తెలిపారు. అఫ్గాన్లోని విదేశీయులను స్వదేశానికి తరలించడం తాలిబన్ల సహకారం లేకుండా సాధ్యమై ఉండేది కాదని పేర్కొన్నారు.
తాలిబన్లు అఫ్గాన్ను(Afghanistan Taliban) ఆక్రమించుకున్నప్పటి నుంచి విదేశాలన్నీ తమ ప్రజలను స్వదేశానికి తరలిస్తున్నాయి. ఒక్క అమెరికానే లక్ష మందిని అప్ఘాన్ నుంచి తీసుకెళ్లింది. భారత్ ఇప్పటివరకు 565 మందిని తరలించింది. వీరిలో 175 మంది దౌత్య సిబ్బంది కాగా.. 263 మంది భారత పౌరులు. 112 మంది అఫ్గాన్ హిందువులు, సిక్కులు. 15మంది ఇతర దేశాలకు చెందినవారు.
యూఎన్ఎస్సీలోని ఇతర సభ్యులు తాలిబన్లతో సంబంధాలు కొనసాస్తున్నప్పటికీ భారత్ దూరంగా ఉంది. అయితే తాజా ప్రకటనలో తాలిబన్లతో భారత్ సంబంధాలు కొనసాగించే సూచనలు కనిపిస్తుండటం ఆందోళనకరమని నిపుణులు అభిప్రాయపడుతున్నారు.
ఇదీ చూడండి: Afghanistan Crisis: అఫ్గాన్ ప్రజలకు ఎందుకీ దుస్థితి?
Kabul Airport: అఫ్గాన్లో మళ్లీ పేలుళ్లకు అవకాశం.. అమెరికా హెచ్చరిక
