నవంబరు 3న జరిగే అధ్యక్ష ఎన్నికలను అమెరికా చరిత్రలోనే అత్యంత ముఖ్యమైనవిగా అభివర్ణించారు డొనాల్డ్ ట్రంప్. పలు రాష్ట్రాల్లో విజయాన్ని నిర్ణయించే 18 లక్షల మంది భారతీయ-అమెరికన్ ఓటర్లు ఈసారి ఎంతో కీలకంగా మారారు. అమెరికాలో మొత్తం 257 మిలియన్ల మంది 18ఏళ్లకు పైబడిన వారున్నారు. వీరిలో 240మిలియన్ల మందికి ఓటు హక్కు ఉంది. 80 మిలియన్ల మంది అమెరికన్లు ఇప్పటకే బ్యాలెట్ ఓటు వేశారు. గత 100 ఏళ్లలో ఎన్నడూ లేని విధంగా ఈసారి ఓటింగ్ శాతం నమోదవుతుందని ఫ్లోరిడా యూనివర్సిటీ అంచనా వేస్తోంది.
ఈసారి ఎన్నికల్లో ప్రజలు ఎంతో ఉత్సాహంగా పాల్గొంటున్నారని, పోలింగ్పై ఆసక్తి కనబరుస్తున్నారని రీడ్ కళాశాలలో పొలిటికల్ సైన్స్ ప్రొఫెసర్ పాల్ గ్రోంకి తెలిపారు. ఓటర్ల సమాచార కేంద్రాన్ని ఆయన నిర్వహిస్తారు.
ఫలితాలను ప్రభావితం చేయగలరు..
పలు రాష్ట్రాల్లో విజయాలను నిర్ణయించి అధ్యక్ష ఎన్నికను ప్రభావితం చేసే భారతీయ-అమెరికన్ ఓటర్లను ఆకర్షించేందుకు రిపబ్లికన్, డెమొక్రటిక్ పార్టీల నాయకులు శతవిధాలా ప్రయత్నిస్తున్నారు. వీళ్లే ఫలితాలను నిర్ణయిస్తున్నారని డెమొక్రటిక్ జాతీయ కమిటీ ఛైర్మన్ థామస్ పెరేడ్ అభిప్రాయపడ్డారు.
భారతీయ-అమెరికన్లు అగ్రరాజ్య అభివృద్ధికి ఎంతో దోహదం చేస్తున్నారని ఐక్యరాజ్య సమితి మాజీ రాయబారి, భారత సంతతికి చెందిన నిక్కీ హాలే తెలిపారు. అమెరికాలో వారికి రక్షణ కల్పించాల్సిన అవసరముందన్నారు. నిరుద్యోగం రేటు పెరిగినా వ్యాపారాలు సజావుగా సాగేందుకు ట్రంప్ కృషి చేసిన విషయాన్ని ప్రజలు గుర్తుంచుకోవాలని సూచించారు.
" భారత్తో గతంలో బలమైన సంబంధాలు లేవు. అది ప్రపంచంలోనే అతిపెద్ద ప్రజాస్వామ్య దేశం. ట్రంప్, ప్రధాని మోదీ మధ్య మంచి సాన్నిహిత్యం ఉంది. ఇప్పుడు కీలకమైన రక్షణ, వాణిజ్య రంగాల్లో భారత్-అమెరికాలు భాగస్వామ్య దేశాలయ్యాయి. "
-నిక్కీ హాలే.
నిక్కీ హాలే అభిప్రాయంతో అనేక మంది భారతీయ-అమెరికన్ ఓటర్లు ఏకీభవిస్తున్నారు. ఈ అధ్యక్ష ఎన్నికల్లో ట్రంప్కే తమ మద్దతు ఉంటుందని చెబుతున్నారు.
భారతీయ-అమెరికన్లు శాంతిభద్రతలను ఇష్టపడతారని హ్యూస్టన్లో ప్రముఖ భారత సంతతి నేత అచ్చలేశ్ అమర్ తెలిపారు.
" కశ్మీర్, సీఏఏ అంశాలపై డెమొక్రటిక్ పార్టీ ముఖ్య నేతలు చేసిన వ్యాఖ్యల పట్ల భారతీయ-అమెరికన్లు అసంతృప్తితో ఉన్నారు. చైనాతో ఉద్రిక్త పరిస్థితులు నెలకొన్న సమయంలో భారత్కు మద్దతుగా అమెరికా నిలవడాన్ని వారు ప్రశంసిస్తున్నారు. ఈ విషయమే వారిని ట్రంప్ వైపు నిలబడేలా చేసింది. "
-అచ్చలేశ్ అమర్.
ట్రంప్ పాలనలో భారతీయ-అమెరికన్లకు పూర్తి సహకారం అందిందని నలంద ఇంటర్నేషనల్ ఎగ్జిక్యూటివ్ డైరెక్టర్, అమెరికా ఎన్నికల నిపుణుడు విభూతి ఝా అన్నారు. అందుకే వారు ఆయన వైపే మొగ్గు చూపుతారని తెలిపారు.
డెమొక్రాట్ల నాయకత్వం, కాంగ్రెస్లోని వారి ఇడ్లీ-సమోసా నేతలు భారత్కు వ్యతిరేక తీర్మానాలకే మద్దతిచ్చారు. మెజారిటీ భారతీయ-అమెరికన్లు ట్రంప్కే ఓటు వేస్తారని భావిస్తున్నాు. భారత వ్యతిరేక శక్తులకు అనుకూల ఎజెండా ఉన్న బైడెన్-హ్యారిస్లపై వారు ఆగ్రహంతో ఉన్నారు.
-విభూతి ఝా.
ట్రంపే గెలవాలి...
ట్రంప్ గెలవాలని ప్రార్థిస్తూ విజయదశమికి ముందే ఆయనకు ఓటు వేశారు లక్ష్మీ మహదేవన్. బైడెన్ గెలిస్తే శాంతిభద్రతలు క్షీణించి, సామాజిక అశాంతి నెలకొని, బంధుప్రీతి పెరుగుతుందని ఆమె భయాందోళన వ్యక్తం చేశారు.
"నవరాత్రి ఉత్సవాల్లో దుర్గామాతకు పూజ చేయడానికి కమలా హ్యారిస్ బంధువులను అనుమతించలేదు. హిందువులను అవమానించినట్లు మాట్లాడారు. ఆ తర్వాత క్షమాపణలు కూడా చెప్పలేదు."
లక్ష్మీ మహదేవన్.
2016 ఎన్నికల్లో భారతీయ-అమెరికన్లకు ఇచ్చిన హామీలను ట్రంప్ నిలబెట్టుకున్నారని రిపబ్లికన్ హిందూ కొయాలిషన్ వ్యవస్థాపకుడు, పారిశ్రామిక వేత్త శలాభ్ కుమార్ అన్నారు. తాను అధికారంలోకి వస్తే శ్వేతసౌధంలో భారత్కు ఎప్పుడూ ఓ మిత్రుడు ఉంటాడని 2016 ఎన్నికల ప్రచారంలో ట్రంప్ చెప్పినట్లు గుర్తు చేశారు. కరోనా సంక్షోభంలోనూ అమెరికా ఆర్థిక వ్యవస్థను కాపాడి, చిన్న చిన్న వ్యాపారాలను ట్రంప్ ప్రోత్సహించారని శలాభ్ చెప్పారు.
