'అర్జున్ రెడ్డి' సినిమాతో విజయ్ దేవరకొండ యంగ్ సెన్సేషన్ అయ్యారు. ఇప్పుడీ హీరో మళ్లీ స్పీడు పెంచుతున్నారు. ఈ ఏడాది వీలైనన్ని ఎక్కువ సినిమాలను సెట్స్ పైకి తీసుకెళ్లి.. వచ్చే ఏడాదిలో బ్యాక్ టు బ్యాక్ సినిమాలను విడుదల చేయాలనే ఆలోచనతో ఉన్నట్లు తెలుస్తోంది. అయితే, గతేడాది 'లైగర్' సినిమా కోసం మిగతా సినిమాలని వెయిటింగ్ లిస్టులో పెట్టారని సమాచారం. తాజాగా ఈ 'రౌడీ' హీరో మరో కొత్త ప్రాజెక్టుతో ప్రేక్షకుల ముందుకు రాబోతున్నారు.
'అర్జున్ రెడ్డి' తర్వాత అదే రేంజ్లో విజయ్కు గుర్తింపు తెచ్చిపెట్టిన సినిమా 'గీతా గోవిందం'. ఈ సినిమాకు పరశురాం దర్శకత్వం వహించారు. గీతా ఆర్ట్స్బ్యానర్పై రూపొందిన ఈ చిత్రం అన్ని వర్గాల ప్రేక్షకులను ఆకట్టుకుంది. దీంతో విజయ్, పరశురాం మరో సారి జట్టు కట్టబోతున్నారు. ఈ కొత్త సినిమాకు దిల్రాజు నిర్మాతగా వ్యవరించబోతున్నారు. ఈ మేరకు శ్రీ వేంకటేశ్వర క్రియేషన్స్.. ట్విట్టర్ వేదికగా ప్రకటించింది. ఈ సినిమాకు సంబంధించిన మరిన్ని వివరాలు త్వరలోనే ప్రకటిస్తామని తెలిపింది. కాగా, ఈ సినిమా.. విజయ్ సూపర్ హిట్ మూవీ 'గీతా గోవిందం'కు సీక్వెల్ అనే ఊహాగానాలు వినిపిస్తున్నాయి.
గతేడాది పూరి జగన్నాథ్ దర్శకత్వంలో విజయ్ హీరోగా వచ్చిన చిత్రం 'లైగర్'.. భారీ అంచనాల నడుమ విడుదలై బాక్సాఫీసు వద్ద ఆశించినంతగా ఆడలేకపోయింది. ఆ సినిమా ఫలితంతో నిరాశపడ్డ విజయ్ దేవరకొండ.. ఇప్పుడు మళ్లీ తన మార్కెట్ను కాపాడుకునే విధంగా సినిమాలకు గ్రీన్ సిగ్నల్ ఇస్తున్నారని తెలుస్తోంది. ఇప్పటికే శివ నిర్వాణ దర్శకత్వంలో వస్తున్న 'ఖుషి' సినిమాకు ఓకే చెప్పారు. దర్శకుడు గౌతమ్ తిన్ననూరితో మరో సినిమాను లైన్లోకి తీసుకువచ్చారు.
