Sajid Khan Sherlin Chopra: బాలీవుడ్ స్టార్ హీరో సల్మాన్ ఖాన్ హోస్ట్‌గా చేసే హిందీ 'బిగ్బాస్' ఇప్పటికి పదిహేను సీజన్లు విజయవంతంగా పూర్తి చేసుకుని, పదహారో సీజన్‌లోకి అడుగు పెట్టింది. ఈ షో మీద మొదటి అనేక విమర్శలు వచ్చాయి. అయితే ఇప్పుడు ఈ షోపై 'మీ టూ' ఎఫెక్ట్ పడింది.
'బిగ్బాస్16'లో పార్టిసిపేట్ చేస్తున్న బాలీవుడ్ దర్శకుడు సాజిద్ ఖాన్పై ముంబయిలోని జుహూ పోలీస్ స్టేషన్‌లో నటి షెర్లిన్ చోప్రా ఫిర్యాదు చేశారు. షో నుంచి సాజిద్ ఖాన్‌ను తప్పించాలని కోరారు.
పోలీస్ కంప్లైంట్ ఇవ్వడానికి కొద్ది రోజుల ముందు సాజిద్ ఖాన్పై షెర్లిన్ విమర్శలు చేశారు. తండ్రి మరణించిన దుఃఖంలో ఉన్న తనకు 2005లో సాజిద్ నుంచి ఫోన్ వచ్చిందని, స్టోరీ చెబుతానని ఇంటికి పిలిచి తనతో అసభ్యంగా ప్రవర్తించాడని ఆమె పేర్కొన్నారు. అసలే దుఃఖంలో ఉన్న తనకు అప్పుడు ఆ ఘటనను ఎవరితో షేర్ చేసుకోవాలో అర్థం కాలేదన్నారు.
అయితే బుధవారం పోలీసులకు ఫిర్యాదు చేసిన షెర్లిన్, కేంద్రమంత్రి అనురాగ్ ఠాకూర్‌కు లేఖ రాయనున్నారని, రెండుమూడు రోజుల్లో 'బిగ్ బాస్' కార్యక్రమాన్ని ప్రసారం చేస్తున్న కలర్స్ టీవీ యాజమాన్యానికి సాజిద్ ఖాన్ ఉన్న ఎపిసోడ్స్ ప్రసారం చేయకూడదని నోటీసులు జారీ చేయనున్నట్లు షెర్లిన్ న్యాయవాది పేర్కొన్నారు.
షెర్లిన్ కన్నా ముందు తనుశ్రీ దత్తా, కనిష్కా సోని
సాజిద్ ఖాన్పై గతంలో కూడా విమర్శలు వచ్చాయి. ఆయన 'బిగ్ బాస్'లో పాల్గొనడంపై ఇండియాలో 'మీ టూ' ఉద్యమం మొదలపెట్టిన కథానాయికల్లో ఒకరైన తనుశ్రీ దత్తా అభ్యంతరం వ్యక్తం చేశారు. సింగర్ సోనా మహాపాత్ర, నటుడు అలీ ఫజల్ తదితరులు ఆయనను షో నుంచి ఎలిమినేట్ చేయాలని కోరారు. ఫేమస్ సీరియళ్లలో నటించిన కనిష్కా సోనీ కూడా తనతో సాజిద్ ఖాన్ అసభ్యంగా ప్రవర్తించారని ఓ వీడియో విడుదల చేశారు.
