రెండు ద్విచక్రవాహనాలను ఆర్టీసీ బస్సు ఢీకొన్న ఘటనలో ఓ వ్యక్తి మృతి చెందగా, ముగ్గురికి తీవ్ర గాయాలయ్యాయి. వికారాబాద్ జిల్లా దోమ మండలం బొంపల్లి గ్రామ శివారులో ఈ ప్రమాదం జరిగింది. క్షతగాత్రులను సమీపంలోని పరిగి ఏరియా ఆస్పత్రికి తరలించి చికిత్స అందిస్తున్నారు. పరిస్థితి విషమించడంతో మెరుగైన చికిత్స కోసం హైదరాబాద్కు తరలించారు.
ప్రమాదం జరిగిందిలా..
పరిగి నుంచి మహబూబ్నగర్ వెళ్తున్న ఆర్టీసీ బస్సు బొంపల్లి గ్రామ శివారుకు రాగానే ఎదురుగా వస్తున్న రెండు బైకులు ఓవర్ టేక్ చేస్తున్న క్రమంలో బస్ డ్రైవర్ వారిని తప్పించే ప్రయత్నం చేశాడు. రెండు ద్విచక్రవాహనాలు బస్సును ఢీకొన్నాయి. ఈ ఘటనలో వాహనదారులకు తీవ్ర గాయాలు కావడంతో... స్థానికులు వెంటనే క్షతగాత్రులను చికిత్స నిమిత్తం పరిగి ఆస్పత్రికి తరలించారు. ఈ ప్రమాదంలో పాలేపల్లి గ్రామానికి చెందిన శివయ్య అనే వ్యక్తి చికిత్స పొందుతూ మృతి చెందాడు. సమాచారం అందుకున్న పోలీసులు కేసు నమోదు చేసుకుని దర్యాప్తు చేస్తున్నారు.
