ఎవరైనా రోడ్డు మీద పాము కనిపిస్తేనే.. ఆమడ దూరం పరుగెడుతారు. అదే ఇంట్లోకి చొరబడితే ఎలా ఉంటుంది. మనమే కాదు ఇంటిల్లిపాది భయంతో వణికిపోతుంటాం.. చుట్టుపక్కల వారిని పిలుస్తాం. కాస్త ధైర్యం తెచ్చుకుని దానిని చంపడానికి ప్రయత్నిస్తాం. లేకపోతే పాములు పట్టే వాడికి సమాచారం ఇస్తాం.. తాజాగా సంగారెడ్డి జిల్లాలోను ఓ వ్యక్తి తన ఇంట్లోకి దూరిన పామును చంపడానికి బాగానే ప్రయత్నం చేశాడు.. ఎంత ప్రయత్నించినా పాము దొరకపోవడంతో విసిగిపోయిన ఆ వ్యక్తి చేసిన పనికి ఇల్లు పొగొట్టుకుని రోడ్డున పడ్డాడు. ఇంతకీ ఆ వ్యక్తి ఏం చేశాడంటే..
సంగారెడ్డి జిల్లా కోహీర్ మండలం బడంపేట్ గ్రామానికి చెందిన గడ్డమీది మొగులయ్య ఇంట్లోకి పాము దూరింది. దసరా పండగ సందర్భంగా ఇల్లు శుభ్రం చేసుకుంటుండగా పాము కనిపించింది. దానిని చంపేందుకు ఆ వ్యక్తి కర్ర తీసుకుని ప్రయత్నాలు చేశాడు. ఎంత యత్నించినా పాము దొరకలేదు. దీంతో విసిగిపోయిన మొగులయ్య కారు టైరు కాల్చి పాము ఉన్న స్థలంలో వేశాడు. టైరు కాలే వాసనకు పాము పారిపోతుందని అనుకుంటే.. మంటలు ఇంటి వాసాలకు అంటుకొని ఇల్లు పూర్తిగా దగ్ధమైంది. ఇంటిని శుభ్రం చేసుకుని పండగకి ఏర్పాటు చేసుకుంటుండగా... పాము భయంతో ఇల్లు కాల్చుకున్నట్లయిందని యజమాని వాపోయాడు.
ఇవీ చదవండి:
