Amazon Prime Lite : అమెజాన్ ప్రైమ్ లైట్ ఎట్టకేలకు అందుబాటులోకి వచ్చేసింది. ఓటీటీ ఫ్యాన్స్ను ఆకట్టుకునేందుకు అమెజాన్ కేవలం రూ.999కే ఈ ప్లాన్ను తీసుకొచ్చింది. అమెజాన్ ప్రైమ్ రెగ్యులర్ ప్లాన్లో ఉన్న దాదాపు అన్ని ప్రయోజనాలు దీనిలోనూ ఉన్నాయి.
యూజర్ బేస్ పెంచుకోవడం కోసం..
అమెజాన్ రెగ్యులర్ ప్రైమ్ సబ్స్క్రిప్షన్ ఇప్పుడు రూ.1499గా ఉంది. ధర కాస్త ఎక్కువగా ఉండడం వల్ల చందాదారులు మళ్లీ రెన్యువల్ చేసుకోవడానికి వెనుకంజ వేస్తున్నారు. మరో వైపు కొత్త వినియోగదారులు కూడా సబ్స్క్రిప్షన్ తీసుకోవడానికి పెద్దగా ముందుకు రావడం లేదు. అందువల్లనే అమెజాన్ తన యూజర్ బేస్ను పెంచుకునేందుకు అమెజాన్ ప్రైమ్ లైట్ ప్లాన్ను తీసుకొచ్చింది.
సింగిల్ ప్లాన్ మాత్రమే..
అమెజాన్ ప్రైమ్ లైట్ సబ్స్క్రిప్షన్ గడువు 12 నెలలు. ఈ ప్లాన్ను ఒకేసారి రూ.999 చెల్లించి తీసుకోవాల్సి ఉంటుంది. రెగ్యులర్ అమెజాన్ ప్రైమ్ ప్లాన్లాగా దీనిలో నెలవారీ, త్రైమాసిక సబ్స్క్రిప్షన్ ప్లాన్స్ లేవు. మొదట్లో కొందరు యూజర్లకు మాత్రమే ప్రైమ్ లైట్ ప్లాన్ను అందించిన అమెజాన్.. ఇప్పుడు అందరికీ దీనిని అందుబాటులోకి తీసుకొచ్చింది.
అమెజాన్ ప్రైమ్ లైట్ - ప్రయోజనాలు
Amazon Prime Lite Benefits : ప్రైమ్ లైట్ చందాదారులు.. ఒకేసారి రెండు డివైజ్ల్లో హెచ్డీ క్వాలిటీ ప్రైమ్ వీడియోలను వీక్షించవచ్చు. దీనితో పాటు అమెజాన్ స్టాండర్డ్ డెలివరీ ఆప్షన్ జత చేయడం వల్ల రెండు రోజుల్లోనే డెలివరీ పొందే అవకాశం ఉంది. అలాగే ఎలిజిబిలిటీ ఉన్న చిరునామాకు రూ.175లు చెల్లించి మార్నింగ్ డెలివరీ సదుపాయాన్ని కూడా పొందవచ్చు. ఐసీఐసీఐ బ్యాంక్ క్రెడిట్ కార్డుతో కొనుగోలు చేస్తే 5 శాతం వరకు క్యాష్బ్యాక్, బిల్ పేమెంట్స్పై 2 శాతం వరకు క్యాష్ బ్యాక్ లభిస్తాయి. అమెజాన్ లైటనింగ్ డీల్స్కు ఎర్లీ యాక్సెస్తో పాటు 'డీల్స్ ఆఫ్ ద డే' కూడా ప్రైమ్ లైట్ యూజర్లు పాల్గొనవచ్చు.
ప్రైమ్ Vs ప్రైమ్ లైట్
Amazon Prime Lite vs Prime : ప్రైమ్ రెగ్యులర్ ప్లాన్ చందాదారులతో పోలిస్తే.. ప్రైమ్లైట్ యూజర్లు కొన్ని ప్రయోజనాలను తక్కువగా పొందుతారు. రెగ్యులర్ ప్లాన్లో ఉన్న వన్ డే డెలివరీ, సేమ్ డే డెలివరీ సదుపాయాలు.. ప్రైమ్ లైట్ వినియోగదారులకు ఉండవు. అలాగే ప్రైమ్ రీడింగ్, ప్రైమ్ మ్యూజిక్, ప్రైమ్ గేమింగ్ కూడా ఉచితంగా దొరకవు. నో కాస్ట్ ఈఎంఐ ఫెసిలిటీ కూడా ఉండదు.
రెగ్యులర్ ప్రైమ్ యూజర్లు 4కే క్వాలిటీతో ఒకే సారి ఆరు డివైజ్ల్లో వీడియోలను వీక్షించగలుగుతారు. కానీ ప్రైమ్ లైట్ ప్లాన్ యూజర్లు.. హెచ్డీ క్వాలిటీ వీడియోలను కేవలం రెండు డివైజ్ల్లో మాత్రమే ఒకేసారి చూడగలుగుతారు. మరీ ముఖ్యమైన విషయం ఏమిటంటే.. ప్రైమ్ లైట్లో ప్రకటనలు కూడా వస్తాయి. ఇది వీక్షకులను కచ్చితంగా చీకాకు పెట్టవచ్చు. ఇవన్నీ మీకు ఓకే అనుకుంటే అమెజాన్ ప్రైమ్ లైట్ను తీసుకోవచ్చు. అయితే రెగ్యులర్ ప్రైమ్ ప్లాన్లాగా అన్ని బెనిఫిట్స్ పొందాలంటే మాత్రం అమెజాన్ రెగ్యులర్ ప్లాన్స్లో రూ.299కే నెలవారీ సబ్స్క్రిప్షన్, రూ.599కు త్రైమాసిక సబ్స్క్రిప్షన్ తీసుకోండి.
