ఎయిర్‌లైన్స్ దిగ్గజం ఎయిర్ ఇండియా ఉద్యోగార్థులకు శుభవార్త వినిపించింది. ఈ సంవత్సరం ఏకంగా 5100 మందిని నూతనంగా విధుల్లోకి తీసుకోనున్నట్లు తెలిపింది. దేశంలోని అనేక నగరాలతో పాటు అంతర్జాతీయంగా తమ కార్యకలాపాలను విస్తరిస్తున్న వేళ ఈ నిర్ణయం తీసుకున్నట్లు ప్రకటించింది.
దేశంలోని వివిధ ప్రాంతాలకు చెందిన వారందరికీ ఈ రిక్రూట్మెంట్లో అవకాశం కల్పిస్తామని సంస్థ తెలిపింది. ఎంపికైన వారిలో సేవా నైపుణ్యాలను పెంపొందించేందుకు 15 వారాల ప్రత్యేక శిక్షణను కూడా ఇవ్వనున్నట్లు చెప్పింది. ఈ శిక్షణను పొందే అభ్యర్థుల కోసం ముంబయిలో ప్రత్యేకంగా తరగతి గదులతో పాటు పలు ఫ్లైట్లలో ట్రైనింగ్కు ఏర్పాట్లు చేయనున్నట్లు ప్రకటించింది.
"కొత్తగా తీసుకునే ప్రతిభావంతుల ద్వారా ఎయిర్ ఇండియా సేవలు మరింత వేగం పుంజుకుంటాయని ఆశిస్తున్నాం. వీటితో పాటు భవిష్యత్తులో మరి కొంతమంది పైలట్లు సహా ఇంజనీర్లను కూడా నియమించుకునే యోచనలో ఉన్నాం." అని ఎయిర్ ఇండియా సర్వీసెస్ అధినేత సందీప్ వర్మ చెప్పారు.
విమాన సేవల విస్తరణలో భాగంగా ఇటీవల పలు విమానాలను కొనుగోలు చేస్తున్న ఎయిర్ ఇండియా.. ఇందుకు అవసరమయ్యే సిబ్బందిని నియమించుకునే ప్రక్రియకు శ్రీకారం చుట్టింది. ఈ నియామక ప్రక్రియను ఈ ఏడాదిలోనే పూర్తి చేయాలని నిర్దేశించుకుంది. అయితే ఈ 5100 మంది మొత్తంలో 4200 మందిని క్యాబిన్ క్రూ ట్రైనీలుగా, విమానంలో ఇతర విభాగాలకు అవసమయ్యే సిబ్బందిని రిక్రూట్ చేసుకోవాలని.. మరో 900 మందిని పైలట్లుగా నియమించుకోవాలని యోచిస్తోంది.
గత 2022 మే నుంచి 2023 ఫిబ్రవరి మధ్య 1900 మంది క్యాబిన్ క్రూ సిబ్బందిని నియమించుకున్నట్లు ఎయిర్ ఇండియా తెలిపింది. గత ఏడు నెలల్లో 1100 మందికి పైగా క్యాబిన్ క్రూకు శిక్షణ ఇవ్వగా.. గత మూడు నెలల్లో సుమారు 500 మంది విధుల్లో చేరారని చెప్పింది.
ఎయిర్ ఇండియా తన విమాన సేవలను విస్తరించేందుకు ఈ నెల ఆరంభంలో బోయింగ్, ఎయిర్బస్ కంపెనీల నుంచి 470 విమానాలను కొనుగోలు చేసేందుకు ఆయా సంస్థలతో ఒప్పందం కుదుర్చుకున్నట్లుగా తెలిపింది. సంస్థ ఇప్పటికే 36 విమానాలను లీజుకు తీసుకునేందుకు ప్రణాళికలను రూపొందించుకోగా.. ఇందులో రెండు బీ 777-200 LR ఫ్లైట్లు ప్రయాణికులకు సేవలందిస్తున్నాయి.
ఇవీ చదవండి:
