అప్పులతో సమతమతమవుతున్న వొడాఫోన్-ఐడియాలో 36శాతం వాటా కేంద్ర ప్రభుత్వం చేతికి వెళ్లింది. బకాయిలను ఈక్విటీలుగా మార్చే ప్రక్రియలో భాగంగా సంస్థలోని 36శాతం షేర్లు ప్రభుత్వానికి అప్పగించినట్లు వొడాఫోన్ ఐడియా అధికారికంగా ప్రకటించింది. ఈ ప్రకటనతో స్టాక్ మార్కెట్లో సంస్థ షేర్ విలువ మంగళవారం సుమారు 14 శాతానికిపైగా పడిపోయింది.
ఈ నిర్ణయం కంపెనీ వాటాదారులకు, ప్రమోటర్లకు ఎదురుదెబ్బగానే చెప్పొచ్చు. స్పెక్ట్రమ్ చెల్లింపులు, ఏజీఆర్ బకాయిల రూపంలో ప్రభుత్వానికి రూ.1.6 లక్షల కోట్లు చెల్లించాల్సి ఉంది.
"ప్రభుత్వానికి చెల్లించాల్సిన బకాయిల వడ్డీ రూ.16వేల కోట్లుగా ఉంటుంది. 2021, ఆగస్టు 14 తేదీ నాటికి కంపెనీ షేర్ ధర ముఖ విలువ కన్నా తక్కువ ఉంది. టెలికాం నియంత్రణ సంస్థ తుది నిర్ణయం మేరకు ప్రభుత్వానికి ఒక్కో షేర్ రూ.10 చొప్పున అప్పగించనున్నాం. ఈ ప్రక్రియతో మా సంస్థలో ప్రభుత్వానికి రూ.35.8 శాతం షేర్లు అందుతాయి. వొడాఫోన్ గ్రూప్నకు 28.5 శాతం, ఆదిత్య బిర్లా గ్రూప్నకు 17.8శాతం షేర్లు ఉంటాయి. "
- వొడాఫోన్ ఐడియా.
2021, సెప్టెంబర్ 30 నాటికి వొడాఫోన్ ఐడియా అప్పులు మొత్తం రూ.1,94,780 కోట్లుగా ఉన్నాయి. అందులో స్పెక్ట్రమ్ చెల్లింపులు రూ.1,08,610, ఏజీఆర్ బకాయిలు రూ.63,400 కోట్లుగా ఉన్నాయి.
ఇదీ చూడండి:
