భారత్లో ఆస్ట్రాజెనెకా వ్యాక్సిన్ ట్రయల్స్ను తిరిగి ప్రారంభించేందుకు సీరం ఇన్స్టిట్యూట్ ఆఫ్ ఇండియా ప్రయత్నిస్తోంది. భారత ఔషధ నియంత్రణ సంస్థ(డీసీజీఐ) నుంచి అనుమతి వచ్చిన తర్వాత ట్రయల్స్ పునఃప్రారంభించనున్నట్లు తెలిపింది.
యూకేలో ఇప్పటికే ఈ టీకా ట్రయల్స్ మళ్లీ మొదలయ్యాయి. వ్యాక్సిన్ ప్రయోగాలు సురక్షితంగానే ఉన్నాయని నియంత్రణ సంస్థ ఇచ్చిన అనుమతితో ట్రయల్స్ ప్రారంభించారు.
"భారత్లో ట్రయల్స్ పునఃప్రారంభించేందుకు డీసీజీఐ అనుమతి ఇస్తే.. టీకా ప్రయోగాలు మేం తిరిగి మొదలుపెడతాం."
-సీరం ఇన్స్టిట్యూట్
వ్యాక్సిన్ తయారీలో హడావుడి ఉండకూడదని సీరం సంస్థ సీఈఓ అదర్ పూనావాలా మరోసారి స్పష్టం చేశారు. ఈ ప్రక్రియలో రాజీ పడకూడదని ఇటీవలి సంఘటనలు ఉదహరణగా నిలుస్తున్నాయని అన్నారు. ట్రయల్స్ పూర్తిగా ముగిసే వరకు టీకాపై తుది నిర్ణయానికి రాకూడదని అన్నారు.
ఆక్స్ఫర్డ్ విశ్వవిద్యాలయం, ఆస్ట్రాజెనెకా సంయుక్తంగా తయారు చేసిన ఈ టీకా మానవ ప్రయోగాలు రోజుల వ్యవధిలోనే మళ్లీ ప్రారంభమయ్యాయి. టీకా తీసుకున్న ఓ వ్యక్తికి ఆరోగ్య సమస్యలు రావడం వల్ల ట్రయల్స్ తొలుత నిలిపివేశారు. దీంతో భారత్లోనూ ఈ ప్రయోగాలు నిలిపివేయాలని సీరం సంస్థను డీసీజీఐ ఆదేశించింది.
