దీపావళికి రెండు రోజుల ముందే మధ్యతరగతి ప్రజలకు పండుగ కానుకలిచ్చింది కేంద్ర ప్రభుత్వం. ప్రజలకు ఊరటనిచ్చే విధంగా 'ఆత్మనిర్భర్ భారత్ 3.0'ను బుధవారం ప్రకటించారు కేంద్ర ఆర్థికమంత్రి నిర్మలా సీతారామన్. ఉపాధి, ఇళ్ల నిర్మాణానికి పెద్ద పీట వేస్తూ ఉద్దీపన ప్యాకేజీని ఆవిష్కరించారు. ఆ వివరాలు..
ఆత్మనిర్భర్ భారత్ రోజ్గార్ యోజన..
- కొత్త ఉపాధి అవకాశాలను మెరుగుపరచడమే లక్ష్యంగా.. 'ఆత్మనిర్భర్ భారత్ రోజ్గార్ యోజన.'
- ఈపీఎఫ్ఐ పరిధిలోని సంస్థ కొత్త ఉద్యోగిని(గతంలో పీఎఫ్లో చేరనివారు లేదా ఉద్యోగం కోల్పోయిన వారు) చేర్చుకుంటే... సంస్థకు, ఉద్యోగికి పీఎఫ్ కంట్రిబ్యూషన్లో రాయితీ. అక్టోబర్ 1 నుంచి ఈ నిర్ణయం అమలు.
- రెండేళ్ల పాటు సంస్థ-ఉద్యోగుల కంట్రిబ్యూషన్లు (24శాతం) ఆయా సంస్థలకు అందజేత.
- ఈపీఎఫ్ఓలో నమోదు చేసుకున్న సంస్థల్లో రూ. 15వేలు కన్నా తక్కువ జీతానికి చేరిన కొత్త ఉద్యోగికి వర్తింపు.
- కరోనా వల్ల 2020 మార్చి 1 అనంతరం ఉద్యోగం కోల్పోయి.. 2020 అక్టోబర్ 1 తర్వాత తిరిగి ఉద్యోగంలో చేరిన వారు(రూ. 10వేల కన్నా తక్కువ జీతం) కూడా ఈ పథకం పరిధిలోకి వస్తారు.
- నిబంధన:- కనీసం 2 కొత్త ఉద్యోగాలు(50 కన్నా తక్కువ సిబ్బంది ఉన్న సంస్థలు), కనీసం 5 కొత్త ఉద్యోగాలు(సిబ్బంది 50కు పైబడిన సంస్థలు).
- 2021 జూన్ 30 వరకు ఈ పథకం అమలు.
పీఎం ఆవాస్ యోజన..
- పట్టణ ప్రాంతాల్లో పీఎం ఆవాస్ యోజనకు అదనంగా రూ.18వేల కోట్లు కేటాయింపు.
- ఈ నిర్ణయంతో కొత్తగా 12 లక్షల ఇళ్లు నిర్మాణం ప్రారంభం, మరో 18 లక్షల ఇళ్లు నిర్మాణం పూర్తి. స్టీల్, సిమెంట్కు భారీగా పెరగనున్న డిమాండ్.
- ఈ చర్యలతో అదనంగా 78 లక్షల ఉద్యోగాలు వచ్చే అవకాశం.
- కాంట్రాక్టులపై పెర్ఫామెన్స్ సెక్యూరిటీ 5 నుంచి 3 శాతానికి తగ్గింపు. ఈ నిర్ణయంతో నిర్మాణ, మౌలిక వసతుల అభివృద్ధి రంగంలోని గుత్తేదారులకు ఊరట. టెండర్లకు ఎర్నెస్ట్ మనీ డిపాజిట్ చేయాల్సిన అవసరం లేదని కేంద్రం స్పష్టీకరణ. 2021 డిసెంబర్ 31వరకు ఈ నిర్ణయం వర్తింపు.
ఆదాయపు పన్ను మినహాయింపు..
- ఇళ్ల నిర్మాణదారులు, కొనుగోలుదారులకు ఊరట కలిగించేలా ఆదాయ పన్ను మినహాయింపు నిబంధనల్లో మార్పులు.
- సర్కిల్ రేట్ల కింద ఉన్న రూ. 2కోట్లు విలువ చేసే ప్రాథమిక నివాస యూనిట్ల అమ్మకాల్లో ఆదాయపు పన్నుపై సండలింపులు.
- సర్కిల్ రేటు- ఒప్పంద విలువ మధ్య ఉన్న 10శాతం వ్యత్యాసాన్ని 20శాతానికి పెంపు.
- ఈ సడలింపులు 2021 జూన్ 30 వరకు అమల్లో ఉంటాయి.
ఇదీ చూడండి:- 'కరోనా టీకా అభివృద్ధి కోసం రూ. 900కోట్లు'
