కరోనా వైరస్ చికిత్స కోసం భారత ఫార్మా దిగ్గజం గ్లెన్మార్క్ కొత్త ఔషధాన్ని ఆవిష్కరించిన కొద్ది గంటల్లోనే మరో డ్రగ్ 'రెమిడెసివిర్'కు అనుమతులు లభించాయి. దేశంలో కరోనా కేసులు పెరిగిపోతున్న నేపథ్యంలో ఈ యాంటీవైరల్ ఔషధానికి డ్రగ్స్ కంట్రోలర్ ఆఫ్ ఇండియా (డీసీజీఏ) నుంచి తయారీ, మార్కెటింగ్ అనుమతులు పొందాయి దేశీయ ఫార్మా సంస్థలు హెటెరో, సిప్లా.
కొవిడ్-19 బారినపడి తేలికపాటి లేదా ఓ మోస్తరు స్థాయిలో బాధపడుతున్న వారికి పరిమిత అత్యవసర వినియోగం (రిస్ట్రిక్టెడ్ ఎమర్జెన్సీ యూస్) కోసం రెమిడెసివిర్కు డీసీజీఏ అనుమతులు ఇచ్చినట్లు అధికార వర్గాలు తెలిపాయి. అయితే.. రెమిడెసివిర్ వినియోగంపై ప్రతి రోగి రాతపూర్వక అనుమతితో పాటు అదనపు క్లినికల్ ట్రయల్స్, మార్కెటింగ్ నిఘా సమాచారం వంటి నివేదిక సమర్పించాలని తెలిపారు.
కేంద్ర ఆరోగ్య శాఖ 'క్లినికల్ మేనేజ్మెంట్ ప్రోటోకాల్స్ ఫర్ కోవిడ్-19'లో భాగంగా అనుమతులు ఇచ్చినట్లు వెల్లడించారు అధికారులు. తీవ్రమైన మూత్రపిండ, కాలేయ వ్యాధులతో బాధపుడుతున్నవారు, గర్భిణీలు, పాలిచ్చే మహిళలు, 12 ఏళ్లలోపు వయస్సు వారికి ఈ మందును వినియోగించకూడదని సూచించారు.
ఇంజక్షన్ రూపంలోని రెమిడెసివిర్ ఔషధాన్ని రోగులకు తొలుత 200ఎంజీ డోస్ ఇవ్వాలి. ఆ తర్వాత ఐదు రోజుల పాటు 100 ఎంజీ డోస్ కొనసాగించాలని ఫార్మా సంస్థలు తెలిపాయి.
దేశీయ ఫార్మా సంస్థలు రెమిడెసివిర్ తయారీ, మార్కెటింగ్ కోసం అమెరికాకు చెందిన గిలిడ్ సైన్సెస్తో నాన్ ఎక్స్క్లూజివ్ లైసెన్స్ ఒప్పందం కుదుర్చుకున్నాయి. రెమిడెసివిర్ను భారత్లోకి తీసుకొచ్చేందుకు మే 29నే భారత డ్రగ్ నియంత్రణ సంస్థ సీడీఎస్సీఓకు దరఖాస్తు చేసుకుంది గిలిడ్ సంస్థ. జూన్ 1న అనుమతులు లభించాయి. హెటెరో, సిప్లాతో పాటు మరో మూడు సంస్థలు బీడీఆర్, జుబిలాంట్, మైలాన్, డాక్టర్ రెడ్డీస్ లాబ్స్ గిలిడ్తో ఒప్పందం చేసుకున్నాయి. అయితే.. వాటి దరఖాస్తులను పరిశీలన చేస్తోంది డీసీజీఏ.
ఇదీ చూడండి: ఇకపై హైదరాబాద్లో ఆ కీలక డ్రగ్ తయారీ..!
