దేశంలో ఇకపై భారతీయ ప్రమాణాలు(బీఐఎస్) కలిగిన హెల్మెట్లనే తయారు చేయాలని, వాటినే వాడాలని కేంద్రం సూచించింది. ఈ మేరకు కేంద్ర రోడ్డు, రవాణా మంత్రిత్వ శాఖ ఆదేశాలు జారీ చేసింది. "హెల్మెట్ ఫర్ రైడర్స్ ఆఫ్ టూ వీలర్స్ మోటార్ వెహికిల్స్ ఆర్డర్, 2020 " అనే పేరుతో మార్గదర్శకాలను విడుదల చేసింది.
రోడ్డు భద్రతపై సుప్రీంకోర్టు గతంలో ఇచ్చిన ఆదేశాల మేరకు ఓ కమిటీని కేంద్రం ఏర్పాటు చేసింది. భారతీయ శీతోష్ణస్థితికి అనుకూలంగా బరువు తక్కువగా ఉన్న హెల్మెట్లను వాడాలని కమిటీ 2018లో సూచనలు చేసింది. ఈ మేరకు కేంద్రం నిర్ణయం తీసుకుంది. ఏటా దేశంలో దాదాపు 1.7కోట్ల ద్విచక్ర వాహనాలు తయారు అవుతున్నాయి.
కేంద్రం తీసుకున్న నిర్ణయాన్ని జెనీవాకు చెందిన 'ది ఇంటర్నేషనల్ రోడ్ ఫెడరేషన్' సంస్థ ప్రశంసించింది. ఇకపై భారత్లో బీఐఎస్ ఆమోదించని హెల్మెట్లను విక్రయిస్తే నేరంగా పరిగణిస్తారని సంస్థ అధ్యక్షుడు కేకే కపిలా తెలిపారు.
ఇదీ చదవండి: ఒక షిఫ్టు 12 గంటలు- ఎందుకంత వ్యతిరేకత?
