ఛత్తీస్గఢ్లో ఘోర రోడ్డు ప్రమాదం జరిగింది. కాంకేర్ జిల్లాలోని కోరేర్ సమీపంలో విద్యార్థులను తీసుకెళ్తున్న ఓ ఆటోను ట్రక్కు ఢీకొట్టింది. ఈ ప్రమాదంలో ఏడుగురు విద్యార్థులు మరణించారు. మరో విద్యార్థి, ఆటోడ్రైవర్ తీవ్రంగా గాయపడ్డారు. స్థానికులు పోలీసులకు సమాచారం అందించారు. హుటాహుటిన ఘటనాస్థలికి చేరుకున్న పోలీసులు.. క్షతగాత్రులను కోరేర్ ప్రాథమిక ఆరోగ్య కేంద్రానికి తరలించారు. ఈ ప్రమాదంపై దర్యాప్తు చేపడుతున్నట్లు పోలీసులు తెలిపారు.
మృతుల వయసు 5 నుంచి 7 సంవత్సరాలలోపే ఉంటుందని పోలీసులు తెలిపారు. తీవ్రంగా గాయపడిన ఓ విద్యార్థి పరిస్థితి విషమంగా ఉన్నట్లు వెల్లడించారు. ఈ ప్రమాదంలో ఇద్దరు చిన్నారులు అక్కడికక్కడే మృతి చెందగా.. మరో ఐదుగురు చిన్నారులు ఆస్పత్రికి తీసుకువెళ్లాక మృతి చెందినట్లు పోలీసులు తెలిపారు. వీరంతా స్కూల్ సెలవులు ముగించుకుని తిరిగి పాఠశాలకు వస్తున్న సమయంలో ఈ ప్రమాదం జరిగినట్లు ఎస్పీ అవినాశ్ ఠాకుర్ తెలిపారు. ప్రస్తుతం పరారిలో ఉన్న ట్రక్కు డ్రైవర్ కోసం విస్తృతంగా గాలింపు చర్యలు చేపడుతున్నామని ఆయన తెలిపారు. మరోవైపు.. ఈ రోడ్డు ప్రమాదంపై ఛత్తీస్గఢ్ ముఖ్యమంత్రి భూపేశ్ బఘేల్ విచారం వ్యక్తం చేశారు. బాధితుల కుటుంబాలను ఆదుకుంటామని ఆయన ట్వీట్ చేశారు.
ఐదుగురు మృతి..
రాజస్థాన్లో ఘోర రోడ్డు ప్రమాదం జరిగింది. ఓ గుర్తు తెలియని వాహనం బైక్ను ఢీకొట్టగా ఐదుగురు వ్యక్తులు మరణించారు. స్థానికులు వెంటనే పోలీసులకు సమాచారం అందించారు. ఘటనా స్థలానికి చేరుకున్న పోలీసులు క్షతగాత్రులను ఆస్పత్రికి తరలించారు. అయితే, అప్పటికే వారు మృతి చెందినట్లు వైద్యులు ధ్రువీకరించారు. ఈ ప్రమాదం రాజ్సమంద్ జిల్లాలోని భీమ్ పోలీస్స్టేషన్ పరిధిలో గురువారం జరిగింది.
ఐదుగురు వ్యక్తులు బైక్పై వెళ్తుండగా.. ఓ గుర్తు తెలియని వాహనం వేగంగా వచ్చి వారిని ఢీకొట్టినట్లు పోలీసులు ప్రాథమికంగా గుర్తించారు. మృతులను భన్వర్ సింగ్ (35), అజయ్ సింగ్(14), లీలా(17), షైతాన్ సింగ్(14), ఉష(16)గా గుర్తించారు. ఈ ఘటనపై కేసు నమోదు చేసుకున్న పోలీసులు.. ఆ గుర్తు తెలియని వాహనం కోసం గాలింపు చర్యలు చేపడుతున్నట్లు తెలిపారు.
