Next chief of Defense staff: తమిళనాడు కూనూర్లో బుధవారం మధ్యాహ్నం హెలికాప్టర్ ప్రమాదం జరిగి భారత తొలి త్రిదళాధిపతి(సీడీఎస్) జనరల్ బిపిన్ రావత్ దుర్మరణం చెందారు. ఈ క్రమంలో ఆయన స్థానాన్ని ఎవరు భర్తీ చేస్తారనే ప్రశ్న తెరపైకి వచ్చింది. తదుపరి సీడీఎస్గా ఎవరు బాధ్యతలు తీసుకుంటారని చర్చ మొదలైంది.
ప్రస్తుతం ఉన్న పరిస్థితులను బేరీజు వేస్తే ప్రస్తుత సైన్యాధిపతి జనరల్ మనోజ్ ముకుంద్ నరవాణెకు త్రిదళాధిపతి అయ్యే అవకాశాలు ఎక్కువగా ఉన్నట్లు పలువురు నిపుణులు అభిప్రాయపడుతున్నారు. ఆర్మీ చీఫ్గా జనరల్ బిపిన్ రావత్ నుంచి 2019, డిసెంబర్ 31న బాధ్యతలు స్వీకరించారు నరవాణె. 2022, ఏప్రిల్ వరకు ఆయన పదవీకాలం ఉంది. అయితే, సీడీఎస్గా నియామకమైతే ప్రభుత్వం పొడిగించే అవకాశం ఉంటుంది. ఆయనకు 65 ఏళ్లు వచ్చే వరకు లేదా కనీసం మూడేళ్లు సీడీఎస్గా బాధ్యతలు చేపట్టేందుకు ఆస్కారం ఉన్నట్లు తెలుస్తోంది.
ఆర్మీ, నేవీ, వాయు సేనల సమన్వయకర్తగా సీడీఎస్ విధులు నిర్వర్తిస్తుంటారు. ఆర్మీలో అత్యంత సీనియర్ అయిన బిపిన్ రావత్ బాధ్యతలు చేపట్టిన పరిస్థితులను పరిశీలిస్తే.. సైన్యంలోని సీనియర్ అధికారినే సీడీఎస్గా ఎంపిక చేసే అవకాశం ఉంది. మరోవైపు.. మూడు దళాల అధినేతలకు పదవీ విరమణ వయసు 62 ఏళ్లగా నిర్ణయించారు. అయితే.. సీడీఎస్కు గరిష్ఠ వయోపరిమితిని విధించలేదు.
వారికి అవకాశం తక్కువే!
ప్రస్తుతం నౌకాదళ అధినేత అడ్మిరల్ ఆర్ హరి కుమార్ ఆ బాధ్యతలు నవంబర్ 30నే స్వీకరించారు. కేవలం 8 రోజులు మాత్రమే అవుతోంది. అలాగే, వాయుసేన చీఫ్ మార్షల్ వివేక్ రామ్ చౌదరి సెప్టెంబర్ 30న బాధ్యతలు తీసుకున్నారు. కేవలం రెండు నెలలు పూర్తయ్యాయి.
ఒకవేళ సీడీఎస్గా నరవాణె బాధ్యతలు స్వీకరిస్తే.. ఆయన స్థానాన్ని నార్తర్న్ ఆర్మీ కమాండర్ లెఫ్టినెంట్ జనరల్ యోగేష్ కుమార్ జోషి లేదా ఆర్మీ వైస్ చీఫ్ లెఫ్టినెంట్ జనరల్ చండీ ప్రసాద్ మొహంతి భర్తీ చేసే అవకాశం ఉంది. మరోవైపు.. లెఫ్టినెంట్ జనరల్ జోషి.. వాయు, నేవీ చీఫ్ల కంటే సీనియర్ కావటం గమనార్హం.
ఇదీ చూడండి: చాపర్ క్రాష్లో సీడీఎస్ రావత్ దుర్మరణం
Army chopper crash: ఆర్మీ హెలికాప్టర్ క్రాష్ లైవ్ వీడియో!
సీడీఎస్ రావత్ హెలికాప్టర్ క్రాష్- ప్రమాద స్థలంలో భయానక దృశ్యాలు
