ప్రియమైన వారు చనిపోతే వారి జ్ఞాపకార్థంగా పేద ప్రజలకు భోజనాలు పెట్టడం, బహుమతులను ఇవ్వటం లాంటి సంఘటనలు చాలానే చూశాం. అయితే గుజరాత్ రాజ్కోట్కు చెందిన సంగీతాబెన్ షా అనే మహిళ మాత్రం చనిపోయిన తన భర్తకు నివాళులను అర్పించేందుకు ఓ వినూత్న ఆలోచనతో ముందుకొచ్చింది. పేద ప్రజలకు రాయితీ అంబులెన్స్ సేవలను అందించాలనే నిర్ణయం తీసుకుంది.
ఏడాదిన్నర క్రితం సంగీతాబెన్ భర్త హరేష్‌భాయ్ మన్సుఖ్లాల్ షా అనారోగ్యం పాలయ్యాడు. దీంతో చికిత్స నిమిత్తం ఆయనను ఆస్పత్రికి తరలించాల్సి వచ్చింది. అయితే ఆ సమయంలో ఆమెకు అంబులెన్స్ చెల్లించడానికి డబ్బులు కూడా లేవు. ఈ కారణంగా సంగీతాబెన్ తన భర్తను ఆస్పత్రికి ఆలస్యంగా తీసుకెళ్లడం వల్ల ఆమె భర్త మరణించాడు. దీంతో అప్పటి నుంచి పేద ప్రజలకు సబ్సిడీ అంబులెన్స్ సేవలను అందించాలని నిశ్చయించుకుంది. రాజ్కోట్ నివాసి అయిన సంగీతాబెన్ షా ముంబయికి చెందిన ఆల్ఫా ఫౌండేషన్ సభ్యురాలు. గుజరాత్ రాష్ట్రంలో క్లిష్టపరిస్థితుల్లో ఉన్న రోగులకు అర్జెంట్గా అంబులెన్స్ సేవ అవసరమైనప్పుడు.. ఆమె అధిక రాయితీతో వారికి ఆ సేవలను అందిస్తోంది. ఈ విధంగా పేద ప్రజల జీవితాలను రక్షించేందుకు ఆమె కృషి చేస్తోంది.
"ఏడాదిన్నర క్రితం చనిపోయిన నా భర్త హరేష్‌భాయ్ మన్సుఖ్లాల్ షా జ్ఞాపకార్థంగా ఈ అంబులెన్స్ సేవలను ప్రారంభించాలని నిర్ణయం తీసుకున్నాను. ఈ సేవల ద్వారా క్లిష్టమైన పరిస్థితిలో ఉన్న రోగులను చికిత్స నిమిత్తం నేపాల్కు కూడా తీసుకెళ్లగలిగాం. గుజరాత్లోని రాజ్కోట్, మోర్బీ, అహ్మదాబాద్ల నుంచి కూడా ఈ అంబులెన్స్ సేవలను అందిస్తున్నాం"
- సంగీతాబెన్ షా , అంబులెన్స్ నిర్వాహకురాలు
సంగీతాబెన్ షా నిస్వార్థమైన కృషి వల్ల లబ్ధిపొందిన అనేక మందిలో జర్నా శర్మ కుటుంబం ఒకటి. ఇటీవల జర్నా కుటుంబం వ్యాపార పనుల కోసం నేపాల్ నుంచి వచ్చారు. ఈ క్రమంలోనే అకస్మాత్తుగా ఆమెకు శ్వాస తీసుకోవడంలో ఇబ్బంది వచ్చి అస్వస్థతకు గురైంది. దీంతో హుటాహుటిన రాజ్కోట్ సివిల్ హాస్పిటల్‌కు తరలించి.. చికిత్స అందించిన్నప్పటికీ ఆమె పరిస్థితి మెరుగుపడలేదు. దీంతో ఆమె కుటుంబ సభ్యులు తదుపరి చికిత్స కోసం నేపాల్కు తిరిగి తీసుకుని వెళ్లాలనుకున్నారు. అయితే నేపాల్కు అంబులెన్స్ ఛార్జీలు తమ తాహతకు మించి ఉన్నాయి. దీంతో ఏం చేయాలని ఆలోచిస్తున్న సమయంలో వారు సంగీతాబెన్ షా అందించే సేవల గురించి తెలుసుకున్నారు. ఆమె సహాయంతో జర్నాను నేపాల్ ఆసుపత్రికి తీసుకెళ్లగలిగారు.
