10 min liquor delivery service: ఆన్లైన్ డెలివరీ సంస్థలకు డిమాండ్ బాగా పెరుగుతోంది. ఇప్పటికే ఫుడ్, షాపింగ్ రంగాల్లో ఆన్లైన్ ఆర్డర్స్ పెరుగుతున్నాయి. ఈ నేపథ్యంలోనే హైదరాబాద్కు చెందిన ఓ స్టార్టప్ సంస్థ పది నిమిషాల్లో మద్యం డెలివరీ చేసే సేవను ప్రారంభించింది. బూజీ అనే బ్రాండ్తో కోల్కతా నగరంలో ఈ సేవలు అందుబాటులోకి వచ్చాయని ఇన్నోవెంట్ టెక్నాలజీస్ ప్రైవేట్ లిమిటెడ్ ప్రకటించింది.
ఇప్పటికే మద్యం డెలివరీ చేసే సంస్థలు ఉన్నాయని.. కానీ పది నిమిషాల్లో చేసే సంస్థ తమదేనని పేర్కొంది. ఎక్సైజ్శాఖ అనుమతి పొందిన తర్వాత కోల్కతాలోని తూర్పు ప్రాంతంలో ప్రారంభిస్తున్నట్లు తెలిపింది. మద్యం డెలివరీ చేసేలా బంగాల్ ప్రభుత్వం తీసుకున్న నిర్ణయాన్ని తాము స్వాగతిస్తున్నామని బూజీ సంస్థ సీఈఓ వివేకానంద తెలిపారు. కల్తీ మద్యం, మైనర్లకు డెలివరీ చేయకుండా నిబద్ధతతో పనిచేస్తామని ఆయన చెప్పారు.
ఇప్పటికే బంగాల్లో స్విగ్గీ మద్యం డెలివరీ సర్వీస్ను అందుబాటులోకి తెచ్చింది. ఆన్లైన్లో మద్యం ఆర్డర్ ఇచ్చేందుకు వినియోగదారులు.. ప్రభుత్వం జారీ చేసిన గుర్తింపు కార్డు, సెల్ఫీ ఫొటోను అప్లోడ్ చేసి వయస్సు ధ్రువీకరించాల్సి ఉంటుందని స్విగ్గీ తెలిపింది. వన్టైమ్ ఇన్స్టంట్ ఏజ్ వెరిఫికేషన్ పేరుతో ఈ ప్రక్రియ జరుగుతుంది. సగటున ఒక వినియోగదారుడికి ఎంత మద్యం విక్రయించాలనే విషయంపైనా బంగాల్ ప్రభుత్వం పరిమితులు విధించినట్లు స్విగ్గీ తెలిపింది. దీనితో పరిమితి దాటిన తర్వాత వినియోగదారులు ఆర్డర్ ఇవ్వలేరని స్పష్టం చేసింది. ఈ సేవలు పొందాలునుకునే వారు స్విగ్గీ యాప్ను అప్డేట్ చేసుకోవాల్సి ఉంటుందని వివరించింది.
ఇదీ చదవండి: స్మార్ట్ సిటీలో యువకులకు పెళ్లి కష్టాలు.. నీళ్లే కారణం!
