నూతన వ్యవసాయ చట్టాలపై కేంద్రంతో మళ్లీ చర్చలు జరిపేందుకు తాము సిద్ధంగా ఉన్నామని భారతీయ కిసాన్ యూనియన్(బీకేయూ) నాయకుడు రాకేశ్ టికాయిత్ చెప్పారు. అయితే.. కేంద్రం ఈ చట్టాలను రద్దు చేసే అంశం గురించి మాత్రమే చర్చిస్తామని పునరుద్ఘాటించారాయన. ఇటీవల మృతిచెందిన అభయ్ సింగ్ సంధు(భగత్సింగ్ మేనల్లుడు) కుటుంబానికి సంతాపం తెలిపేందుకు మొహాలి(ఛత్తీస్గఢ్)కి వెళ్లిన ఆయన.. ఈ మేరకు అక్కడి విలేకర్లతో సంభాషించారు. కేంద్రం.. రైతుల డిమాండ్లను నెరవేర్చకపోతే నిరసన స్థలాల నుంచి స్వస్థాలకు తిరిగొచ్చే ప్రసక్తే లేదని టికాయిత్ స్పష్టం చేశారు. కేంద్రం ఏదైనా మాట్లాడితే.. సంయుక్త కిసాన్ మోర్చా(ఎస్కేఎం)తోనే చర్చించాలన్నారు.
ఆ రోజున 'బ్లాక్ డే'
అన్నదాతలు నిరసన చేపట్టి ఈ నెల 26 నాటికి ఆరు నెలలు పూర్తవుతున్న సందర్భంగా.. ఆ రోజున 'బ్లాక్ డే'గా పాటించనున్నారు. అదే రోజున దేశవ్యాప్త నిరసన చేపట్టాలని ఎస్కేఎం పిలుపునిచ్చింది. దానికి రైతు సంఘాలు మద్దతు తెలిపాయి.
కొత్త సాగు చట్టాలను నిరసిస్తూ.. గతేడాది నవంబర్ నుంచి దేశవ్యాప్తంగా ఆందోళన చేపట్టారు అన్నదాతలు. వీటిపై కేంద్రం మళ్లీ చర్చలు జరపాలని కోరుతూ.. ఎస్కేఎం అధ్వర్యంలో 40కిపైగా రైతు సంఘాలు గత శుక్రవారం.. ప్రధాని నరేంద్రమోదీకి లేఖ రాశాయి.
కొత్త వ్యవసాయ చట్టాలపై ప్రతిష్ఠంభనను తొలగించేందుకు.. కేంద్రం ఇప్పటికే రైతులతో పలుదఫాలుగా చర్చలు జరిపింది. సాగు చట్టాలను రద్దు చేయాల్సిందేనని రైతులు పట్టుబట్టడం వల్ల ఆ చర్చలు విఫలమయ్యాయి.
ఇదీ చదవండి: పాల డెయిరీల్లో నిర్వహణ లోపాలే శాపాలు
