Railway Ticket Confirmation Rules : ముందుగా తమకు కేటాయించిన రిజర్వ్డ్ సీటును వేరే వ్యక్తులకు ఎలా కేటాయిస్తారన్న విషయంపై కోర్టును ఆశ్రయించిన ఓ వ్యక్తికి.. రూ.40 వేల నష్టపరిహారం చెల్లించాలని భారతీయ రైల్వే శాఖను ఆదేశించింది బెంగళూరులోని వినియోగదారుల కమిషన్.
అదనంగా చెల్లించి ప్రయాణం..
కర్ణాటక.. బెంగళూరులోని వైట్‌ఫీల్డ్‌లో నివాసం ఉంటున్న అలోక్ కుమార్ అనే వ్యక్తి 2022 మార్చి 15న తల్లిదండ్రులు, అతడి ప్రయాణం కోసం ఐఆర్సీటీసీ వెబ్సైట్లో టికెట్స్ బుక్ చేశాడు. మే 21న దిల్లీ నుంచి బిహార్లోని బరౌనీకి వెళ్లేందుకు రాజధాని ఎక్స్ప్రెస్ రైలులో రూ.6,995 చెల్లించి సీట్లను రిజర్వ్ చేయించుకున్నాడు. ఈ క్రమంలో ప్రయాణం రోజున రైలు ఎక్కే సమయంలో ప్రయాణికుల పీఎన్ఆర్ (PNR) నంబర్ సరిగ్గానే ఉందని.. కానీ టికెట్ ఇంకా కన్ఫామ్ కాలేదని రైల్వే సిబ్బంది చెప్పారు. అందుకే వెంటనే రైలు దిగిపోవాలని.. లేదంటే ఫైన్ చెల్లించి ప్రయాణం కొనసాగించాలని రైల్వే సిబ్బంది సూచించారు. దీంతో వెంటనే ఈ విషయంపై ఫిర్యాదు చేసేందుకు అలోక్ కుమార్ ఐఆర్‌సీటీసీని ఫోన్, ఈ-మెయిల్ ద్వారా సంప్రదించాడు. అక్కడి నుంచి ఎటువంటి స్పందన లేకపోవడం వల్ల చేసేదేమీలేక అధికారులు చెప్పినట్లుగా అదనంగా రూ.22,300 జరిమానాను చెల్లించి ప్రయాణం చేశారు. ఆ తర్వాత అదనంగా చెల్లించిన ఈ ఫైన్ను వసూలు చేసుకునేందుకు ఎన్ని ప్రయత్నాలు చేసినా ఫలితం లేకపోయింది.
కోర్టు ఖర్చులతో సహా..
ఈ పరిణామాలతో విసుగు చెందిన అలోక్ కుమార్ తనకు జరిగిన అన్యాయానికి బాధ్యులైన ఐఆర్సీటీసీ, భారతీయ రైల్వేపై జిల్లా కస్టమర్ రిడ్రెసల్ కమిషన్లో ఫిర్యాదు చేశారు. ముందుగానే టికెట్స్ బుక్ చేసుకున్నా అదనంగా చెల్లించిన రూ.22,300లను తిరిగి పొందేలా సదరు సంస్థకు ఆదేశాలు ఇవ్వాలని ఫిర్యాదులో అభ్యర్థించారు. ఈ నేపథ్యంలో కేసుకు సంబంధించి రైల్వే శాఖకు నోటీసులు జారీ చేసింది వినియోగదారుల కమిషన్. అయినా అక్కడి నుంచి ఎటువంటి స్పందన రాలేదు. కాగా, ఈ వ్యవహారంలో తమ పాత్ర ఏమీ లేదని.. రైల్వే శాఖ నిర్ణయమే అంతిమమని ఐఆర్సీటీసీ కమిషన్కు తేల్చి చెప్పింది. దీంతో సంబంధిత అన్ని పత్రాలను పరిశీలించిన జిల్లా వినియోగదారుల కమిషన్లోని త్రిసభ్య ధర్మాసనం భారతీయ రైల్వేకు ఈ మేరకు నోటీసులు జారీ చేసింది. సదరు ప్రయాణికుడికి రూ.40 వేలు చెల్లించాలని ఆదేశించింది.
DA Hike For Railway Employees : రైల్వే ఉద్యోగులకు గుడ్న్యూస్.. 4 శాతం DA పెంచిన కేంద్రం
