Rahul Gandhi Varun Gandhi Kedarnath : గాంధీ కుటుంబానికి చెందిన ఇద్దరు వారసులు కలుసుకోవడం రాజకీయంగా ప్రాధాన్యం సంతరించుకుంది. ఇప్పటికే బీజేపీకీ దూరంగా ఉంటున్న వరుణ్ గాంధీ.. రాహుల్ గాంధీని కలవడం వల్ల యూపీ రాజకీయాలు మరోసారి చర్చనీయాంశమయ్యాయి. వరుణ్ గాంధీ కాంగ్రెస్లోకి వస్తారని అనేక సార్లు వార్తలు రాగా.. ఈ భేటీతో అవి మరోసారి ఊపందుకున్నాయి. అయితే, వరుణ్ గాంధీ కాంగ్రెస్ పార్టీలోకి చేరతారన్న వార్తలతో పాటు టీఎంసీలోకి వెళ్లే అవకాశం ఉన్నట్లు ఊహాగానాలు కూడా వస్తున్నాయి.
మరోవైపు వీరిద్దరి కలయికపై స్పందించిన కాంగ్రెస్ నేతలు.. వరుణ్ గాంధీ, ఆయన తల్లి మేనకా గాంధీని పార్టీలోకి తీసుకోవడంపై సోనియా, రాహుల్ గాంధీనే నిర్ణయం తీసుకుంటారని చెబుతున్నారు. ప్రస్తుతం వరుణ్ గాంధీ పీలీభీత్ ఎంపీగా ఉండగా.. మేనకా గాంధీ సుల్తాన్పుర్ ఎంపీగా కొనసాగుతున్నారు. కేదార్‌నాథ్‌ పర్యటనలో ఉన్న కాంగ్రెస్ అగ్రనేత రాహుల్ గాంధీ, బీజేపీ ఎంపీ వరుణ్ గాంధీ మంగళవారం అనుకోకుండా కలుసుకున్నారు.
"నాకు తెలిసి ఇది అనుకోకుండా జరిగిన ఓ సమావేశం. రాజకీయాల్లో ఏదైనా సాధ్యమే.. కానీ, వీరిద్దరూ కలిసి మాట్లాడుకోవాలనుకుంటే మరో ప్రదేశాన్ని ఎంచుకునేవారు. మతపరమైన ప్రదేశాలు కాకుండా వేరే ప్రాంతాల్లో కూర్చుని మాట్లాడుకునేవారు. వరుణ్ బీజేపీకి వ్యతిరేక వైఖరి తీసుకోవడం వల్లే ఈ ఊహాగానాలు వస్తున్నాయి. ఆయన చేరికపై నిర్ణయం తీసుకునేది గాంధీ కుటుంబం మాత్రమే."
--పీఎల్ పూనియా, కాంగ్రెస్ నేత
మరోవైపు కేంద్రంలో అధికారాన్ని దక్కించుకోవాలంటే కీలకమైన ఉత్తర్ప్రదేశ్లో సత్తా చాటడం తప్పనిసరి అని కాంగ్రెస్ భావిస్తోంది. అందుకోసమే 80 లోక్సభ స్థానాలున్న ఉత్తర్ప్రదేశ్పై ప్రియాంక గాంధీ ప్రత్యేకంగా దృష్టి సారించారు. 2019లో ఎన్నికల్లో ప్రభావం చూపలేకపోయిన కాంగ్రెస్ కేవలం ఒకే స్థానాన్ని గెలుచుకుంది. ఆ తర్వాత జరిగిన 2022 అసెంబ్లీ ఎన్నికల్లోనూ 2 ఎమ్మెల్యేలతో సరిపెట్టుకుంది. ఈ ఫలితాలతో అప్రమత్తమైన కాంగ్రెస్.. కీలకమైన యూపీలో పార్టీని బలోపేతం చేసేందుకు నడుం బిగించింది. తాజాగా మాజీ మంత్రి అజయ్ రాయ్ను.. పీసీసీ చీఫ్గా ప్రకటించింది. దీంతో పాటు ఎస్పీ, బీఎస్పీకి చెందిన అనేక మంది నేతలను పార్టీలోకి చేర్చుకుంది.
"రాహుల్, వరుణ్ కలుసుకోవడంలో ఎలాంటి తప్పు లేదు. పార్టీ మార్పు వార్తలపై ఆయనే మాట్లాడాలి. భవిష్యత్తు కార్యచరణపై వరుణ్ స్పందించాలి. మనం ఎందుకు మాట్లాడాలి? మరో గాంధీ కూడా యూపీ రాజకీయాల్లోకి వస్తే మాత్రం.. ఆయన అధికార కేంద్ర బిందువుగా మారి అనేక సమస్యలు ఉత్పన్నమయ్యే ప్రమాదం ఉంది."
--అఖిలేశ్ ప్రతాప్ సింగ్, కాంగ్రెస్ ఎమ్మెల్యే
అయితే, రెండు గాంధీ కుటుంబాల మధ్య మాత్రం సరైన సంబంధాలు లేవని పార్టీ వర్గాలు చెబుతున్నాయి. కాంగ్రెస్ మాజీ అధినేత్రి సోనియా గాంధీ, బీజేపీ ఎంపీ మేనకా గాంధీ చాలా కాలంగా పరస్పరం దూరంగా ఉంటున్నారు. రాజీవ్‌గాంధీ సోదరుడైన సంజయ్‌గాంధీ కుమారుడు వరుణ్ గాంధీ.. రాహుల్ కంటే పదేళ్లు చిన్నవారు. అయితే, వరుణ్ వివాహం 2011లో జరగగా.. స్వయంగా వరుణ్ గాంధీ వెళ్లి రాహుల్ను పెళ్లికి ఆహ్వానించారు. కానీ ఆ కార్యక్రమానికి సోనియా గాంధీ, రాహుల్ హాజరుకాలేదు.
కార్పొరేట్లకేమో 80% రుణాలు.. యువత, రైతులకు 9 శాతమా?: భాజపా ఎంపీ
'రాహుల్కు పెళ్లి చేద్దాం.. మంచి అమ్మాయిని చూడండి'.. మహిళా రైతులతో సోనియా గాంధీ
