కేంద్రంపై తరుచుగా విమర్శలు చేస్తున్న కాంగ్రెస్ అగ్రనేత రాహుల్ గాంధీపై(rahul gandhi news) వ్యంగ్యస్త్రాలు సంధించింది భాజపా. రాహుల్ గాంధీ 'భారత రాజకీయాల్లో ఒక రాజకీయ కోకిల' అని అభివర్ణించింది. రాహుల్.. పార్టీని బలోపేతం చేసేందుకు క్షేత్రస్థాయిలో పని చేయాలనుకోరని, తన రాజకీయ ఎజెండా కోసం ఇతరుల కష్టాన్ని వాడుకుంటారని ఎద్దేవా చేసింది. కోకిల కూడా సొంతంగా తన గూటిని నిర్మించుకోలేదని.. ఇతర పక్షుల గూళ్లలో స్థావరాన్ని వెతుక్కుంటుందని గుర్తుచేసింది.
ఉత్తర్ప్రదేశ్ ముజఫర్పుర్లో రైతులు నిర్వహించిన మహాపంచాయత్పై.. పాత చిత్రాలను రాహుల్ గాంధీ షేర్ చేయటంపై విమర్శలు గుప్పించారు భాజపా అధికార ప్రతినిధి(bjp spokesperson) సంబిత్ పాత్ర. ఇది అబద్ధాలు వ్యాప్తి చేయటం, ప్రజల్లో గందరగోళాన్ని సృష్టించేందుకు చేసే రాజకీయాల్లో భాగమని ఆరోపించారు.
" కాంగ్రెస్కు పూర్తిస్థాయి అధ్యక్షుడు లేరు. దాంతో క్షేత్రస్థాయిలోని సమస్యలను లేవనెత్తలేకపోతున్నారు. అందుకే సోనియా గాంధీ ఇతర పార్టీల నేతలతో వర్చువల్గా సమావేశాలు నిర్వహిస్తున్నారు. ప్రజల్లో గందరగోళం సృష్టించేందుకు రాహుల్ గాంధీ పాత చిత్రాలపై ఆధారపడుతున్నారు. కోకిల తన గూటిని నిర్మించుకోలేదు. ఇతర పక్షుల గూళ్లలో స్థావరాన్ని వెతుక్కుంటుంది. రాహుల్ గాంధీ సైతం అలాగే వ్యవహరిస్తున్నారు. తన పార్టీని బలోపేతం చేసేందుకు ఆయన పనిచేయాలనుకోరు. తన రాజకీయాల కోసం ఇతరుల కష్టాన్ని వాడుకునే అలవాటుతోనే అలా చేస్తారు. "
- సంబిత్ పాత్ర, భాజపా అధికార ప్రతినిధి.
మోదీ ప్రభుత్వం ఎప్పుడూ రైతుల బాగు కోసమే పని చేస్తోందని, ఎప్పటికీ చేస్తూనే ఉంటుందన్నారు సంబిత్ పాత్ర. రైతులకు ఇప్పటి వరకు 1.5 లక్షల కోట్లు పెట్టుబడి సాయం, రికార్డు స్థాయిలో పంట కొనుగోళ్లు చేశామని గుర్తు చేశారు.
మార్నింగ్ కన్సల్ట్ సర్వేలో.. 13 దేశాల అధినేతల్లో మోదీ తొలిస్థానంలో నిలవటంపైనా స్పందించారు భాజపా నేత. అది కేవలం ప్రభుత్వ విజయాలతోనే సాధ్యమైందన్నారు. వ్యాక్సినేషన్పై రాహుల్ గాంధీ విమర్శలను తిప్పికొట్టారు. ఇటీవల ఒకే రోజులో కోటికిపైగా డోసులు పంపిణీ చేసినట్లు గుర్తు చేశారు. మొత్తంగా 68.75 కోట్ల మందికి కనీసం ఒక్క డోసైనా అందినట్లు తెలిపారు. దీనిపై రాహుల్ గాంధీ కనీసం ఒక్క ట్వీట్ కూడా చేయలేదన్నారు.
ఇదీ చూడండి: Rahul Gandhi: 'నిరంకుశ వ్యవస్థతో దేశం నలిగిపోతోంది'
