భారత్.. ఈ ఏడాది 100 దేశాలకు 65 మిలియన్లకుపైగా కొవిడ్ టీకాలను అందించిందని ప్రధానమంత్రి నరేంద్ర మోదీ తెలిపారు. మన ఫార్మా రంగాన్ని ప్రపంచ దేశాలు విశ్వసిస్తున్నాయని.. అందుకే ఈ రోజున భారత్ 'ఫార్మసీ ఆఫ్ ద వరల్డ్'గా గుర్తింపు దక్కించుకుందని అభిప్రాయపడ్డారు.
ఫార్మా రంగానికి సంబంధించిన తొలి గ్లోబల్ ఇన్నోవేటివ్ సదస్సులో వీడియో కాన్ఫరెన్స్ ద్వారా పాల్గొన్నారు ప్రధాని. వైద్యపరికరాలు, ఔషధాల్లో సరికొత్త ఆవిష్కరణలు చేసే వ్యవస్థను ఏర్పాటు చేయడం భారత్ లక్ష్యమని పేర్కొన్నారు. అన్ని విధాలుగా ఆలోచించి, అందరిని సంప్రదించిన తర్వాతే తమ విధానాలను రూపొందిస్తున్నామన్నారు.
ఫార్మా రంగాన్ని మరింత ఎత్తుకు తీసుకెళ్లే శక్తిసామర్థ్యం భారత్కు ఉందని వెల్లడించారు మోదీ. టీకాలు, మందుల్లో వినియోగించే కీలక పదార్థాలను దేశంలోనే తయారు చేసే విధంగా కృషి చేయాలన్నారు.
"కరోనా మహమ్మారి తొలినాళ్లలో.. కీలక వైద్యపరికరాలు, ప్రాణాలు కాపాడే ఔషధాలను ప్రపంచ దేశాలకు ఎగుమతి చేశాము. ఈ ఏడాది 100 దేశాలకు 65మిలియన్ల కొవిడ్ టీకాలను సరఫరా చేశాము. సామర్థ్యాన్ని పెంచుకునే పనిలో ఉన్న మేము.. మరింత సాయం చేయగలము. అందుకే ఇప్పుడు ప్రపంచ దేశాలు భారత్ను 'ఫార్మసీ ఆఫ్ ద వరల్డ్'గా గుర్తిస్తున్నాయి. రండి.. భారత్లో ఆలోచించండి, భారత్లో ఆవిష్కరించండి, భారత్లో తయారు చేయండి. మా వద్ద ప్రతిభ ఉంది, వనరులు ఉన్నాయి. మా వద్ద అన్నీ ఉన్నాయి."
--- నరేంద్ర మోదీ, ప్రధానమంత్రి.
భారత ఆర్థిక వృద్ధిలో ఫార్మా రంగం కీలక పాత్ర పోషిస్తోందని మోదీ ఉద్ఘాటించారు. దేశంలో 30లక్షల మందికి ఉద్యోగాలిచ్చి, 13బిలియన్ డాలర్ల వాణిజ్య మిగులు ఉన్న రంగం ఫార్మా అని పేర్కొన్నారు. 2014 నుంచి దేశ ఆరోగ్య సంరక్షణ రంగానికి.. 12బిలియన్ డాలర్లకుపైగా విదేశీ పెట్టుబడులు లభించాయని, భవిష్యత్తులో మరిన్ని దక్కించుకునే సామర్థ్యం ఉందని అభిప్రాయపడ్డారు.
ఈ సదస్సు రెండు రోజుల పాటు జరగనుంది. ఆవిష్కరణలకు కావాల్సిన నిధులు, మౌలిక వసతులతో పాటు వివిధ అంశాలపై 40 దేశాల ప్రతినిధులు ఈ సదస్సులో చర్చించనున్నారు.
ఇదీ చూడండి:- 'క్రిప్టో కరెన్సీ అలాంటి వారి చేతుల్లోకి చేరకుండా చూడాలి'
