Online Ludo Love: ఆన్లైన్ గేమ్ ద్వారా పరిచయమైన వ్యక్తి కోసం భర్త, బిడ్డలను వదిలేసి దేశ సరిహద్దు దాటేందుకు సిద్ధమైంది ఓ మహిళ. ఇందుకు కోసం సరిహద్దు వరకు చేరుకుంది. కానీ అప్పటికే ఈ విషయం తెలుసుకున్న స్థానిక పోలీసులు మహిళను అదుపులోకి తీసుకున్నారు. ఈ ఘటన పంజాబ్లో గురువారం వెలుగు చూసింది.
గేమ్తో పరిచయం..
రాజస్థాన్కు చెందిన ఆ మహిళ తరచూ ఆన్లైన్లో లూడో ఆడుతుండేది. ఈ క్రమంలో పాకిస్థాన్కు చెందిన ఓ టీనేజర్తో పరిచయం ఏర్పడింది. అది కాస్తా ప్రేమగా మారింది. ఇకపై ఆ యువకుడితోనే కలిసి జీవించాలని ఆ మహిళ నిశ్చయించుకుంది. పాక్ యువకుడి సూచనల మేరకు భర్తను బిడ్డను వదిలేసి పంజాబ్ చేరుకుంది. వాఘా సరిహద్దు ద్వారా పాకిస్థాన్లోకి ప్రవేశించాలని ఆ మహిళ భావించింది.
ఆటో డ్రైవర్ అనుమానంతో..
అమృత్సర్కు వచ్చిన మహిళను వాఘా బార్డర్ చేరుకోమని ప్రియుడు సూచించాడు. దీంతో మహిళ ఆటోను బుక్ చేసుకుంది. మహిళను వాఘా బార్డర్ చేర్చమని పాక్ యువకుడు ఫోన్ ద్వారా డ్రైవర్కు సూచనలు ఇచ్చాడు. దీనిపై అనుమానం వ్యక్తం చేసిన డ్రైవర్ పోలీసులకు సమాచారం అందించాడు. దీంతో హుటాహుటిన ఘటనాస్థలానికి చేరుకున్న పోలీసులు మహిళను అదుపులోకి తీసుకున్నారు.
గత 10-12 రోజులుగా తరచూ యువకుడితో మాట్లాడుతున్నట్లు మహిళ పేర్కొంది. సరిహద్దు దాటి వస్తే తనను కలుసుకుంటానని అతను చెప్పినట్లు తెలిపింది. కానీ వాఘా వద్దకు తీసుకెళ్లేందుకు ఆటో డ్రైవర్ సహకరించలేదని చెప్పుకొచ్చింది.
మహిళ వద్ద కొంత డబ్బు, నగలు కూడా ఉన్నాయని పోలీసులు వెల్లడించారు. ఆమె గురించి కుటుంబసభ్యులకు సమాచారం అందించామని పేర్కొన్నారు.
ఇదీ చూడండి : 'వర్చువల్ ర్యాలీలు, ఆన్లైన్ ఓటింగ్ సాధ్యమేనా?'.. ఈసీకి హైకోర్టు ప్రశ్న
