రూ. 10 కోట్లు ఇవ్వకుంటే చంపేస్తామంటూ.. కేంద్ర రవాణా శాఖ మంత్రి నితిన్ గడ్కరీకి బెదిరింపు కాల్స్ వచ్చాయి. మంగళవారం మహారాష్ట్ర నాగ్పుర్లో ఉన్న గడ్కరీ కార్యాలయానికి ఓ వ్యక్తి మూడు సార్లు కాల్ చేసినట్లు పోలీసులు తెలిపారు. గడ్కరీ కార్యాలయ సిబ్బంది సమాచారంతో అలర్ట్ అయిన పోలీసులు.. ఆయన ఇల్లు, కార్యాలయం వద్ద భారీ బందోబస్తు ఏర్పాటు చేశారు.
బెదిరింపు కాల్స్ చేసిన వ్యక్తి తనను తాను జయేశ్ పుజారిగా చెప్పుకున్నాడని నాగ్పుర్ రెండో జోన్ డిప్యూటీ సీపీ రాహు మాడనే వెల్లడించారు. మంగళవారం ఉదయం రెండు సార్లు.. మధ్యాహ్నం ఒకసారి ఫోన్ చేసి రూ. 10 కోట్లు డిమాండ్ చేశాడని.. ఇవ్వకపోతే చంపేస్తానని బెదిరించాడని తెలిపారు. ఆ కాల్స్ చేసిన వ్యక్తి ఎవరో, ఎక్కడి నుంచి చేస్తున్నాడో అనే విషయాలు ఇంకా తెలియాల్సి ఉంది.
ఈ ఘటనపై దర్యాప్తు ప్రారంభించిన పోలీసులు.. కాల్ వచ్చిన నంబర్ను మంగళూరులోని ఓ మహిళకు చెందినదిగా గుర్తించారు. అయితే, ఈ కాల్ ఆ మహిళే చేసిందా?.. లేదా జయేశ్ పూజారి అనే వ్యక్తి చేశాడా? అనే విషయంపై దర్యాప్తు చేస్తున్నారు. జయేశ్ పూజారి.. ఓ మర్డర్ కేసులో యావజ్జీవ శిక్ష అనుభవిస్తున్న ఖైదీ అని తెలిసింది. దీనిపై అతడిని విచారించగా, తనకూ.. ఈ బెదిరింపు కాల్స్కు ఎలాంటి సంబంధం లేదని చెప్పాడు.
నితిన్ గడ్కరీకి జనవరి 14న కూడా ఇలాంటి కాల్స్ వచ్చాయి. తాను జయేశ్ పూజారినని.. రూ. 100 కోట్లు ఇవ్వాలని.. లేదంటే చంపేస్తానని దుండగుడు బెదిరించాడు. తాను దావూద్ ఇబ్రహీం గ్యాంగ్ సభ్యుడినని చెప్పుకున్నాడు. మంగళవారం సాయంత్రం నితిన్ గడ్కరీ నాగ్పుర్ రానున్న నేపథ్యంలో మరోసారి ఇదే తరహా కాల్స్ రావడం కలకలం రేపింది.
పుట్టిన రోజే చంపేస్తామంటూ..
ఇలాంటి హైప్రొఫైల్ రాజకీయ నాయకులకు డెత్ త్రెట్ కాల్స్ రావడం ఇదే మొదటి సారి కాదు. గతేడాది డిసెంబర్లో ప్రముఖ రాజకీయ నాయకుడు శరద్ పవార్ పుట్టిన రోజున ఆయనను చంపేస్తామంటూ.. కొందరు దుండగులు బెదిరింపు కాల్స్ చేశారు. శరద్ పవార్కు అంతకుముందు కూడా ఇలాంటి కాల్స్ వచ్చాయి. దీంతో భయభ్రాంతులకు గురైన కుటుంబ సభ్యులు పోలీసులకు ఫిర్యాదు చేశారు. ఈ ఘటనపై దర్యాప్తు చేపట్టిన పోలీసులు నిందితుడిని అరెస్టు చేశారు. ఆ నిందితుడిని పోలీసులు ఎలా పట్టుకున్నారో తెలియాలంటే ఇక్కడ క్లిక్ చేయండి.
