ఇంటికి దిష్టిబొమ్మలు వేలాడదీయడం గురించి మనకు తెలుసు. కానీ, ఇంటి ముందు నీలం డబ్బాను వేలాడదీయడం ఎప్పుడైనా చూశారా? హరియాణా పానీపత్లోని(Haryana panipat blue bottle) మోడల్ టౌన్ కాలనీలోకి వెళితే ఈ వింతను మనం చూడొచ్చు. ఈ కాలనీలోని ఒకటి కాదు.. రెండు కాదు ప్రతి ఇంటి ముందు ఓ నీలం రంగు డబ్బా(Blue bottle hanging at homes) వేలాడుతూ ఉంటుంది. అయితే.. ఈ కాలనీవాసులంతా ఇలా ఎందుకు చేస్తున్నారు? దీని వెనుక ఏదైనా బలమైన కారణం ఉందా? ఈ ప్రశ్నలకు మోడల్టౌన్ కాలనీ వాసులు చెప్పే సమాధానం వింటే... ఎవరికైనా ఆశ్చర్యం కలగకమానదు.
ఇంతకీ వాళ్లు ఏం చెబుతారంటే..?
ఈ కాలనీలో ఒకప్పుడు కుక్కల బెడద చాలా ఉండేది. ఇళ్లలోకి శునకాలు వచ్చి కరవడం.. ఆహార పదార్థాలను ఎత్తుకెళ్లడం వంటివి చేసేవి. శునకాలు చేసే బీభత్సంతో విసిగిపోయిన కాలనీ వాసులు ఈ నీలి సీసా పరిష్కారాన్ని(Blue bottle dogs) కనిపెట్టారు. ఇంటి ముందు ఇలా నీలి రంగు సీసాను వేలాడదీస్తే కుక్కలు రావని నమ్మడం మొదలుపెట్టారు. ఈ కాలనీలో తొలుత ఒకరు ప్రారంభించిన ఈ పద్ధతిని ఇరుగుపొరుగు వారు తెలుసుకుని వాళ్లు కూడా అనుసరించడం మొదలు పెట్టారు. ఇప్పుడు అది క్రమంగా దాదాపు ఈ కాలనీ అంతటికీ పాకింది.
తెలిసినా..
తమకు ఇది మూఢవిశ్వాసం అని తెలిసినా దీని వెనుక ఏదైనా శాస్త్రీయ కోణం ఉండవచ్చన్న కారణంతో ఈ పద్ధతిని అనుసరిస్తున్నామంటున్నారు పలువురు కాలనీవాసులు.
"మా కాలనీలో కుక్కల బెడద తీవ్రంగా ఉంది. రోడ్డు మీద వెళ్లే వారిని కరుస్తాయి. వీటి వల్ల ఇళ్ల ముందు అపరిశుభ్రంగా ఉంటున్నాయి. దీనికి పరిష్కారం కోసం చూస్తుంటే ఓ రోజు మా పక్కింటి వారి ఇంటి ముందు నీలి మందు సీసా ఉండటం చూశాను. ఇది ఏంటని వారిని అడిగితే కుక్కల బెడద పోగొట్టేందుకు పంజాబ్లోని తమ గ్రామంలో ఇలాగే చేస్తారు అని చెప్పారు. ఇది మూఢ నమ్మకమని తెలిసినా దీని వెనుక ఏదైనా శాస్త్రీయ కోణం ఉండొచ్చని అనుసరించాను. కానీ దీని వల్ల ఎలాంటి పరిష్కారం లేదు.
-శశి అగర్వాల్, కాలనీ వాసి
ఈ వింత పద్ధతిని అనుసరిస్తున్న వారిలో చాలామంది విద్యావంతులు కూడా ఉండటం గమనార్హం.
ఇదీ చూడండి : నగరంలో 'చిరుత' ఫోబియా.. కుక్కను చూసినా భయంతో..
