గల్వాన్ ఘటనలో అమరులైన 20 మంది భారత జవాన్లకు విశిష్ఠ గుర్తింపు దక్కింది. గణతంత్ర దినోత్సవానికి ప్రదర్శించబోయే జాతీయ యుద్ధ స్మారక చిహ్నంపై వారి పేర్లను చెక్కినట్టు అధికారులు తెలిపారు. అంతేకాకుండా.. ఈ ఏడాది గణతంత్ర దినోత్సవాన్ని పురస్కరించుకుని వీరికి.. మరణాంతర సైన్య పురస్కారాలు అందించనుంది కేంద్రం. వీరిలో కొందరు శౌర్య పురస్కారం కూడా అందుకోనున్నారు.
చైనాతో సరిహద్దు ఉద్రిక్తతల నేపథ్యంలో గతేడాది జూన్ 15న జరిగిన ఘటనలో వీరు ప్రాణాలు కోల్పోయారు. 16వ బిహార్ రెజిమెంట్ కమాండింగ్ అధికారి కల్నల్ బి. సంతోశ్ బాబు ఈ భీకర పోరాటంలో ప్రాణాలర్పించిన వారిలో ఒకరు.
నాడు.. ఏం జరిగిందంటే.?
భారత్-చైనా సరిహద్దులో ఉద్రిక్తతలు పతాక స్థాయికి చేరిన తరుణంలో.. గల్వాన్లోని పెట్రోలింగ్ పాయింట్-14 వద్ద అక్రమ కట్టడాలను వ్యతిరేకించిన భారత సైనికులపై చైనా దాడి చేసింది. రాళ్లు, ముళ్లకర్రలు, ఇనుప రాడ్లతో చైనా సైనికులు దాడి చేశారు. ఈ క్రమంలో 20 మంది భారత సైనికులు మృతిచెందారు. ఈ దాడుల్ని గత రెండు దశాబ్దాల చరిత్రలోనే అత్యంత తీవ్రమైనవిగా పేర్కొన్నారు అధికారులు. అయితే.. ఈ ఘటనలో చైనా సైనికులు ఎంతమంది మరణించారనేది తెలియరాలేదు. కానీ.. దాదాపు 35 మంది ప్రాణాలు కోల్పోయారని అమెరికన్ ఇంటలిజెన్స్ నివేదిక వెల్లడించింది.
ఇదీ చదవండి: ఆ పార్టీల మధ్య 'గోలీమార్' రాజకీయం
