నాగాలాండ్​ కాల్పుల ఘటనలో సైన్యంపై పోలీసుల కేసు

Nagaland firing news: దేశవ్యాప్తంగా సంచలనం సృష్టించిన నాగాలాండ్​ కాల్పుల ఘటనపై ఆ రాష్ట్ర పోలీసులు కేసు నమోదు చేశారు. పౌరుల మృతిలో ప్రమేయం ఉందంటూ సైన్యంలోని 21వ పారా ప్రత్యేక దళ సభ్యులపై సుమోటో ఎఫ్​ఐఆర్​ దాఖలు చేశారు.

"4వ తేదీ సాయంత్రం ఈ ఘటన జరిగింది. ఆ సమయంలో భద్రత దళాలతో పాటు పోలీసు గైడ్లు లేరు. అసలు భద్రతా దళాలు ఎవరికీ సమాచారం కూడా అందించలేదు. పౌరులను హత్య చేయాలన్న ఉద్దేశంతోనే భద్రతా బలగాలు ఈ ఘటనకు పాల్పడినట్టు దీని ద్వారా అర్థమవుతోంది. నేరస్థులపై అధికారులు కఠిన చర్యలు చేపట్టాలి."

--- ఎఫ్​ఐఆర్​

ఓటింగ్​ ప్రాంతంలో తిరుగుబాటుదారులు సంచరిస్తున్నారనే పక్కా సమాచారంతో శనివారం సాయంత్రం సైన్యం ఆపరేషన్​ చేపట్టింది. 21 కమాండోలు రంగంలోకి దిగి.. ఓ వాహనాన్ని అడ్డుకున్నారు. ఆదేశాలిచ్చినా.. ఆ వాహనం ఆగకుండా వెళ్లిపోవడం వల్ల కమాండోలకు అనుమానం మరింత పెరిగింది. చివరికి కాల్పులు జరిపారు. ఈ ఘటనలో ఆరుగురు మరణించారు. సమాచారం అందుకున్న స్థానికులు.. సైనిక శిబిరాలను ధ్వంసం చేశారు. ఈ ఘటనలో ఓ జవాను మరణించాడు. పలువురు గాయపడ్డారు. ప్రజలను చెదరగొట్టేందుకు.. భద్రతా దళాలు కాల్పులు జరపక తప్పలేదు. ఫలితంగా మరో ఏడుగురు పౌరులు మరణించారు. మరికొందరు గాయపడ్డారు.

మృతుల సంఖ్య ఎంత?

Nagaland firing incident death toll: ఘటన జరిగిన మోన్​ పట్టణంలో సెక్షన్​ 144న కొనసాగుతోంది. అయితే మృతుల సంఖ్య సందిగ్ధx నెలకొంది. కాల్పుల ఘటనలో 17మంది మరణించారని గిరిజనుల సంఘం కోన్యాంక్​​ యూనియన్​ తొలుత ప్రకటించింది. ఆ తర్వాత దానిని 14కు సవరించింది. శని, ఆదివారాల్లో జరిగిన వేరువేరు ఘటనల్లో 14మంది పౌరులు మరణించారని పోలీసులు చెబుతున్నారు.

మొత్తం మీద 28మంది గాయపడ్డారని.. వారిలో ఆరుగురి పరిస్థితి విషమంగా ఉందని అధికారులు వెల్లడించారు.

నాగాలాండ్​లో నిరసనలు

కాల్పుల ఘటనపై నాగాలాండ్​లో నిరసనలు కొనసాగుతున్నాయి. అనేక దుకాణాలు మూతపడ్డాయి. జనజీవనం స్తంభించింది. ఐదు రోజుల పాటు సంతాప దినాలు ప్రకటించారు. ప్రజలు ఎలాంటి ఉత్సవాల్లో పాల్గొనకూడదని పిలుపునిచ్చారు.

షా ప్రకటన..

నాగాలాండ్​ కాల్పుల ఘటన సెగ పార్లమెంట్​ను తాకింది. ప్రభుత్వం స్పందించాలని విపక్షాలు నిరసనకు దిగాయి. ఈ క్రమంలో రాజ్యసభ పలుమార్లు వాయిదా పడింది.

Amit shah statement on Nagaland fire incident: కేంద్ర హోంమంత్రి అమిత్​ షా.. ఈ అంశంపై మధ్యాహ్నం ప్రకటన చేశారు. శని, ఆదివారాల్లో జరిగిన ఘటనలను వివరించారు. ఈ వ్యవహారంపై సిట్​ను ఏర్పాటు చేసినట్టు, నెల రోజుల్లో దర్యాప్తు పూర్తిచేయాలని ఆదేశించినట్టు స్పష్టం చేశారు. పౌరుల మృతి పట్ల దిగ్భ్రాంతి వ్యక్తం చేశారు. మృతుల కుటుంబాలకు సంతాపం తెలిపారు.

ఇదీ చూడండి:- నాగాలాండ్ ఘటనపై సైన్యం ప్రత్యేక దర్యాప్తు