ప్రజాస్వామ్య అనుకూలవాదులు చేస్తున్న నిరసనలపై మయన్మార్ సైన్యం ఉక్కుపాదం మోపుతోంది. సైనిక పాలనకు వ్యతిరేకంగా ఆందోళనబాట పట్టిన వారిపై స్నైపర్లతో దాడి చేయించింది. ఈ ఘటనలో పలువురు మరణించినట్లు తెలుస్తోంది. ఎనిమిది మంది గాయపడ్డారు.
50 మంది నిరసనకారులను అదుపులోకి తీసుకుంది సైన్యం. నిరసనకారులపై నిజమైన తూటాలతో దాడి చేస్తున్నారని సామాజిక మాధ్యమాల్లో ఓ నెటిజన్ వెల్లడించారు. మయన్మార్ వ్యాప్తంగా స్నైపర్లను సైన్యం మోహరించిందని చెప్పారు.
నిరసన చేస్తున్న టీచర్లపై ఆదివారం ఉదయం స్టన్ గన్లతో సైన్యం దాడికి పాల్పడిందని మరో నెటిజన్ తెలిపారు. థింగాంగ్యున్ టౌన్షిప్లో ఓ నిరసనకారుడు మృతి చెందాడని చెప్పారు. దావేయి ప్రాంతంలోనూ ఓ వ్యక్తి మరణించాడని పేర్కొన్నారు. మావ్లామ్యాయింగ్లో ఒకరు, యంగోన్లో ఇద్దరు మృతి చెందినట్లు మరొక నెటిజన్ తెలిపారు.
