ఒడిశా కటక్లో విషాదం నెలకొంది. గోపీనాథ్పుర్-బదంబా వంతెనపై తొక్కిసలాట జరిగింది. ఈ ఘటనలో ఒక మహిళ మరణించగా.. 20 మందికి తీవ్ర గాయాలయ్యాయి. వీరిలో అనేక మంది చిన్నారులు, మహిళలు ఉన్నారు. క్షతగాత్రుల్లో నలుగురి పరిస్థతి విషమంగా ఉన్నట్లు అధికారులు తెలిపారు. వీరిని కటక్లోని ఎస్సీబీ మెడికల్ ఆసుపత్రిలో చేర్పించినట్లు వారు వెల్లడించారు. మృతురాలిని 45 ఏళ్ల అంజనగా గుర్తించారు. ప్రమాదంపై స్పందించిన ముఖ్యమంత్రి నవీన్ పట్నాయక్.. మృతురాలి కుటుంబానికి రూ. 5 లక్షల పరిహారాన్ని ప్రకటించారు. గాయపడిన వారు త్వరగా కోలుకోవాలని ఆకాంక్షించారు.
మకర సంక్రాంతిని పురస్కరించుకుని సింగనాథ్ ఆలయంలో జరుగుతున్న మకర మేళా కోసం అనేక మంది భక్తులు వెళ్తున్నారు. ఈ క్రమంలోనే వంతెనపై ప్రజల తాకిడి అధికమైంది. కొవిడ్ కారణంగా రెండేళ్ల విరామం తర్వాత ఈ వేడుకలు జరగడం వల్ల భక్తులు అధిక సంఖ్యలో వచ్చారని.. ఒక్కసారిగా వంతెనపైకి రావడమే కారణమని సబ్ కలెక్టర్ హేమంత్ కుమార్ తెలిపారు. కటక్, పూరి, దెంకనాల్ తదితర జిల్లాల నుంచి భక్తులు పెద్ద సంఖ్యలో హాజరయ్యారు. ఈ ఘటనపై విచారణ జరిపించాలని అధికారును ఆదేశించారు కటక్ కలెక్టర్ భబానీ శంకర్ చైనీ. మకర మేళా జరుగుతున్న సింగనాథ్ ఆలయ సమీపంలో 144 సెక్షన్ విధించాలని ఆయన అధికారులకు సూచించారు.
